ਬਣਦੀ ਸਦਾ ਜ਼ੁਬਾਨ ਜ਼ਰੀਆ, ਦੁਖ-ਸੁਖ ਪੁੱਛਣ ਦੱਸਣ ਦਾ
ਫੇਰ ਭਲਾ ਕੀ ਕੰਮ ਹੈ ਕੁਝ ਵੀ, ਦਿਲ ਵਿਚ ਦਬ ਕੇ ਰੱਖਣ ਦਾ
ਦਿਲ ਅਪਨੀ ਮਰਜ਼ੀ ਦਾ ਮਾਲਿਕ , ਇਹ ਕਦ ਵਸ ਵਿਚ ਰਹਿੰਦਾ ਹੈ,
ਬੰਦਾ ਜ਼ੋਰ ਬਥੇਰਾ ਲਾਉਂਦੈ , ਇਸ ਨੂੰ ਰੋਕਣ ਟੋਕਣ ਦਾ
ਜਿਸ ਨੂੰ ਮਿਲਨਾ ਚਾਹੁੰਨੈ , ਦਿਲ ਚੋਂ , ਸਾਰੇ ਰੋਸ ਭੁਲਾ ਕੇ ਮਿਲ,
ਸਿੱਧੇ ਮੂੰਹ ਜੇ ਗੱਲ ਨਹੀਂ ਕਰਨੀ , ਕੀ ਫਾਇਦਾ ਗਲ਼ ਲੱਗਣ ਦਾ
ਦਿਲ ਨੇ ਜਿਸ ਤੇ ਆਉਣਾ ਹੋਇਆ , ਆ ਜਾਣਾ ਬਿਨ ਪੁੱਛਿਆਂ ਹੀ,
ਇਸ ਨੇ ਤੈਨੂੰ ਵਕਤ ਕਦੇ ਨਾ , ਦੇਣਾ ਸੋਚਣ ਪਰਖਣ ਦਾ
ਦੁਨੀਆਂ ਚੇਤੇ ਰੱਖਦੀ ਕੇਵਲ, ਚੰਗੇ ਮੰਦੇ ਕਂਮਾਂ ਨੂੰ ,
ਜਿਸ ਨੇ ਆਖਿਰ ਮਿੱਟੀ ਹੋਣੈ , ਨਾ ਕਰ ਮਾਣ ਸੁਹੱਪਣ ਦਾ
ਦਿਲ ਦਾ ਭੇਤ ਜੋ ਦਿੰਦੈ ਸਭ ਨੂੰ , ਅਪਨਾ ਚੈਨ ਗਵਾਉਂਦਾ ਹੈ,
ਹਰ ਪਲ ਹੀ ਡਰ ਬਣਿਆ ਰਹਿੰਦਾ, ਉਸ ਨੂੰ ਪਰਦਾ ਉੱਠਣ ਦਾ
ਮੈਂ ਉਸ ਨੁੰ ਅਪਨਾ ਰੱਬ ਸਮਝਾਂ , ਸਮਝੇ ਹੋਰ ਕਿਸੇ ਨੂੰ ਓਹ,
' ਨੇਰੇ ਵਿੱਚੋਂ ਭਾਲ ਰਹੇ ਹਾਂ , ਦੋਵੇਂ ਟੁਕੜਾ ਚਾਨਣ ਦਾ
ਜਾਣਾ ਜਾਣਾ ਨਾ ਕਰ ਐਵੇਂ , ਬਹਿ ਜਾ ਹਾਲੇ ਹੋਰ ਘੜੀ ,
ਵੈਸੇ ਦਿਲ ਨੇ ਫਿਰ ਵੀ ਮਿੱਤਰਾ , ਨਾ ਨਹੀਂ ਲੈਣਾ ਰੱਜਣ ਦਾ
ਰੁਸਣਾ, ਮੰਨਣਾ, ਮੇਲ, ਵਿਛੋੜਾ, ਚਲਦਾ ਰਹਿਣਾ ਜੀਵਨ ਵਿਚ,
ਗ਼ਮੀਆਂ ਵੇਲੇ ਰੋਣ ਦਾ ਚੱਕਰ , ਖ਼ੁਸ਼ੀਆਂ ਵੇਲੇ ਹੱਸਣ ਦਾ
ਰੱਬ ਹੀ ਜਾਣੇ ਕਿੰਜ ਉਹ ਡੁੱਬਾ, ਆ ਕੇ ਕੋਲ ਕਿਨਾਰੇ ਦੇ,
ਖ਼ੁਦ ਨੂੰ ਜਿਹੜਾ ਸਮਝ ਰਿਹਾ ਸੀ, ਤਾਰੂ ਹਰ ਇਕ ਪੱਤਣ ਦਾ
ਦੇਖੋ ਹੁਣ ਕੀ ਬਣਦੈ ਉਸਦਾ , ਨਾਲ ਉਨਾਂ ਦੇ ਰਲਿਆ ਜੋ,
ਸ਼ੌਕ ਜਿਨਾਂ ਦਾ ਚਾੜ ਕੇ ਕੋਠੇ , ਮਗਰੋਂ ਪੌੜੀ ਚੱਕਣ ਦਾ
ਸਿੱਧੇ ਸਾਦੇ ਲਫ਼ਜ਼ਾਂ ਵਿਚ ਮੈਂ , ਅਪਨੇ ਸ਼ਿਅਰ ਸੁਣਾਉਂਦਾ ਹਾਂ ,
ਤੇਰੇ ਮਨ ਤੇ ਬੋਝ ਪਵੇ ਨਾ , ਅਰਥ ਇਨਾਂ ਦੇ ਸਮਝਣ ਦਾ
ਹੁਣ ਤਕ ਮੈਂ ਤਾਂ ਉਮਰ ਗੁਜ਼ਾਰੀ , ਦਿਲ ਦਾ ਮਹਿਰਮ ਭਾਲਦਿਆਂ,
ਖਵਰੇ ਕਿਸ ਦਿਨ ਮੁਕਣੈ ਚੱਕਰ , ਮੇਰੇ ਭਟਕਣ, ਤੜਪਣ ਦਾ
ਇਸ਼ਕ ਬੜਾ ਤੜਪਾਉਂਦੈ, ਹੋਸ਼ ਭੁਲਾਉਂਦੈ , ਜਾਨ ਸੁਕਾਉਂਦਾ ਹੈ ,
ਫਿਰ ਵੀ ਜਜ਼ਬਾ ਰੱਖਦੈ ' ਮਹਿਰਮ ' , ਏਡਾ ਚੁੱਕਣ ਚੱਕਣ ਦਾ
-----------------------------------------------------
ਬਹੁਤ ਪ੍ਰਭਾਵਸ਼ਾਲੀ ਗਜ਼ਲ
ReplyDeleteਸਾਹਿਤਕ ਸਲਾਮ ਵੀਰ ਜੀ,
ReplyDeleteਰਚਨਾ ਤੇ ਧਿਆਨ ਦੇਣ ਲਈ ਤੇ ਇਸ ਨੂੰ ਪਸੰਦ ਕਰਨ ਲਈ
ਤੁਹਾਡਾ ਬਹੁਤ ਬਹੁਤ ਸ਼ੁਕਰੀਆ ਜੀ |ਰਚਨਾਵਾਂ ਨੂੰ ਆਪਣਾ ਪਿਆਰ ਇਸੇ ਤਰਾਂ
ਦਿੰਦੇ ਰਹਿਣਾ |ਹੱਸਦੇ ਵੱਸਦੇ ਰਹੋ ,
ਰੱਬ ਤੁਹਾਨੂੰ ਹਮੇਸ਼ਾ ਹੀ ਖੁਸ਼ ਤੇ ਚੜਦੀ ਕਲਾ ਚ ਰੱਖੇ ...
ਪੰਜਾਬੀ ਦੇ ਵਿਚ ਲਿਖਣ ਵਾਲੀਆ ਨੂੰ ਜੋੜਨ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ ਤੇ ਇਸ ਕਰਕੇ ਤੁਹਾਡਾ ਬਲੋਗ , ਪੰਜਾਬੀ ਮੇਰੀ ਆਵਾਜ ਨਾਲ ਜੋੜ ਦਿਤਾ ਗਿਆ ਹੈ ਉਮੀਦ ਹੈ ਕੀ ਤੁਸੀ ਵੀ ਇਸ ਬਲਾਗ ਦਾ ਲਿੰਕ http://punjabirajpura.blogspot.com/ ਨੂੰ ਆਪਣੇ ਬਲਾਗ ਨਾਲ ਜੋੜੋਗੇ ਤੇ ਸਾਡੇ ਬਲਾਗ ਤੇ ਵੀ ਦਰਸ਼ਨ ਦੇਵੋਗੇ
ReplyDeleteਧੰਨਵਾਦ
ਤੁਹਾਡੇ ਬਲਾਗ ਨੂੰ ਪੜਨ ਵਾਲਾ ਤੇ ਤੁਹਾਡਾ ਦੋਸਤ
ਵਿਨੋਦ ਕੁਮਾਰ