ਗ਼ਜ਼ਲ.................................................
ਉਨੂੰ ਮਿਲਣਾ ਝਨਾਂ ਤੋਂ ਪਾਰ ਜਾ ਕੇ ਸੀ , ਨਹੀਂ ਮਿਲਿਆ
ਰਿਹਾਂ ਮੰਝਧਾਰ ਵਿਚ ਫਸਿਆ, ਕਿਨਾਰਾ ਹੀ ਨਹੀਂ ਮਿਲਿਆ
ਮਨਾਂ ਤੇ ਬੋਝ, ਖਾਲੀਪਨ , ਉਦਾਸੀ ਚਿਹਰਿਆਂ ਉੱਤੇ,
ਜੋ ਵੀ ਮਿਲਿਆ , ਬਿਨਾਂ ਇਸ ਤੋਂ, ਕਦੇ ਕੋਈ ਨਹੀਂ ਮਿਲਿਆ
ਮੈਂ ਇਹ ਤਾਂ ਕਹਿ ਨਹੀਂ ਸਕਦਾ, ਕਿਸੇ ਤੋਂ ਪਿਆਰ ਮਿਲਿਆ ਨਈਂ,
ਮਗਰ ਮੈਨੂੰ , ਜਦੋਂ ਇਸਦੀ , ਜ਼ਰੂਰਤ ਸੀ , ਨਹੀਂ ਮਿਲਿਆ
ਜੁਦਾਈ, ਬੇਬਸੀ, ਗ਼ਮ, ਦਰਦ , ਧੋਖਾ , ਬੇਰੁਖੀ ਯਾਰੋ ,
ਤੁਸੀਂ ਸਭ ਕੁਝ ਬੜਾ ਦਿਤੈ , ਤੁਹਾਥੋਂ ਕੀ ਨਹੀਂ ਮਿਲਿਆ
ਬਥੇਰੇ ਯਾਰ ਨੇ ਮੇਰੇ , ਬੜੇ ਗ਼ਮਖ਼ਾਰ ਨੇ ਮੇਰੇ ,
ਮਗਰ ਸੀ ਆਰਜ਼ੂ ਜਿਸਦੀ , ਉਹ ਹਾਲੇ ਵੀ ਨਹੀਂ ਮਿਲਿਆ
ਉਡਾਰੀ ਮਾਰ ਕੇ ਕਾਰੂੰ, ਸਿਕੰਦਰ ਛਿਪ ਗਿਆ ਕਿੱਥੇ ,
ਖ਼ਜ਼ਾਨਾ ਕੀ , ਉਦਾ ਘਰ ਜਿਸ ਗਲੀ ਵਿਚ ਸੀ, ਨਹੀਂ ਮਿਲਿਆ
ਰਿਹਾ ਮਸਰੂਫ਼ 'ਮਹਿਰਮ' ਪੀਣ ਵਿਚ ਜਾਂ ਹੋਰ ਕੰਮਾਂ ਵਿਚ,
ਮੇਰੀ ਮਹਿਫ਼ਿਲ 'ਚ ਆ ਕੇ ਵੀ, ਉਹ ਮੈਨੂੰ ਹੀ ਨਹੀਂ ਮਿਲਿਆ
========================= ਛਁ
No comments:
Post a Comment