ਤੁਹਾਡੇ ਰੂਬਰੂ ਹਾਂ

ਗ਼ਜ਼ਲ --- ਇਹ ਨਹੀਂ ਰੁਕਦੇ ਕਿਸੇ ਦੇ ਰੋਕਿਆਂ -------------------------------------------

2010-12-15T09:21:00.001-08:00

ਗ਼ਜ਼ਲ ------------------------

ਹਰ ਕਿਸੇ ਦਾ ਖ਼ਾਬ ਹੁੰਦੈ, ਪਿਆਰ ਪੀਘਾਂ ਪਾਉਣ ਦਾ ।

ਮੈਂ ਕਿਵੇਂ ਨਾ ਸੋਚਦਾ ਫਿਰ, ਦਿਲ ਕਿਸੇ ਸੰਗ ਲਾਉਣ ਦਾ ।

ਫੈਸਲਾ ਹੀ ਕਰ ਲਿਆ , ਤੈਨੂੰ ਜਦੋਂ ਅਪਨਾਉਣ ਦਾ ।

ਹੱਕ ਹੈ ਤੈਨੂੰ ਹਰ ਤਰ੍ਹਾਂ , ਮੇਰੀ ਵਫ਼ਾ ਅਜ਼ਮਾਉਣ ਦਾ ।

ਇਸ ਜ਼ਮਾਨੇ ਦਾ ਪਤਾ ਨਈਂ, ਇਸ਼ਕ ਸੰਗ ਕੀ ਵੈਰ ਹੈ,

ਹਰ ਕਦਮ ਤੇ ਜ਼ੋਰ ਲਾਉਂਦੈ, ਹਰ ਖੁਸ਼ੀ ਝਟਕਾਉਣ ਦਾ ।

ਰੁਖ ਹਵਾ ਦਾ ਮੋਡ਼ ਸਕਦੈ ਹਾਂ ਅਗਰ ਤੂੰ ਮੇਰੇ ਨਾਲ ਏਂ,

ਸ਼ੌਕ ਮੈਨੂੰ ਹੈ ਬਡ਼ਾ ਗਲ਼ ਨੇਰ੍ਹੀਆਂ ਨੂੰ ਲਾਉਣ ਦਾ ।

ਜ਼ਿੰਦਗੀ ਵਿਚ ਆ ਹੀ ਜਾਂਦੇ ਨੇ ਅਜਿਹੇ ਮੋਡ਼ ਵੀ,

ਵਕਤ ਮਿਲਦੈ ਆਪਣੇ ਹਰ ਜ਼ੁਰਮ ਤੇ ਪਛਤਾਉਣ ਦਾ ।

ਐ ਜ਼ਮਾਨੇ 1 ਇਹ ਨਹੀਂ ਰੁਕਦੇ ਕਿਸੇ ਦੇ ਰੋਕਿਆਂ,

ਆਸ਼ਕਾਂ ਨੂੰ ਕਰ ਨਾ ਐਵੇਂ, ਤੂੰ ਯਤਨ ਸਮਝਾਉਣ ਦਾ ।

ਵਕਤ ਕਰਦਾ ਜੇ ਵਫ਼ਾ, ਤਾਂ ਪਾਂਦੀਆਂ ਨਾ ਦੂਰੀਆਂ ,

ਦੋਸਤਾ 1 ਕੁਝ ਨਈਂ ਪਤਾ ਲਗਦਾ ਬੁਰੇ ਦਿਨ ਆਉਣ ਦਾ ।

ਸਭ ਗਿਲੇ ਸ਼ਿਕਵੇ ਭੁਲਾ ਕੇ , ਭੇਜਦਾ ਤੂੰ ਖ਼ਤ ਅਗਰ ,

ਮੈਂ ਵੀ ਹੀਲਾ ਕਰ ਹੀ ਲੈਣਾ ਸੀ ਤੇਰੇ ਤਕ ਆਉਣ ਦਾ ।

ਬੈਠ ਮੇਰੇ ਕੋਲ, ਗੱਲਾਂ ਕਰ ਜ਼ਰਾ ਦਿਲ ਖੋਲ੍ਹ ਕੇ,

ਵਕਤ ਨੇ ਦਿੱਤੈ ਅਸਾਨੂੰ ਫਿਰ ਸਮਾਂ ਮੁਸਕਾਉਣ ਦਾ ।

ਨਾਮ ਤੇਰੇ ਮੈਂ ਹੈ ਕੀਤੀ ਇਹ ਗ਼ਜ਼ਲ , ਮਨਜ਼ੂਰ ਕਰ ,

ਸ਼ੁਕਰੀਆ 1 ਤੇਰਾ ਮੇਰੇ ਤੋਂ ਕੁਝ ਨਾ ਕੁਝ ਲਿਖਵਾਉਣ ਦਾ ।

ਕਰ ਲਿਆ ਕਰ ਦਿਲ-ਲਗੀ ਬੇਸ਼ੱਕ ਤੂੰ ਮਹਿਰਮ ਨਾਲ ਵੀ,

ਸ਼ੌਕ ਹੈ ਤੈਨੂੰ ਜੇ ਉਸਨੂੰ ਬੇਵਜ੍ਹਾ ਤਡ਼ਫਾਉਣ ਦਾ ।

--------------------------------------------------

ਕਲਮ ਦੇ ਹਥਿਆਰ ਬਾਰੇ ਸੋਚਦਾ ਹਾਂ .........

2010-07-27T23:37:00.000-07:00

ਗ਼ਜ਼ਲ ............................

ਮੈਂ ਜਦੋਂ ਸੰਸਾਰ ਬਾਰੇ ਸੋਚਦਾ ਹਾਂ
ਮਹਿਕਦੀ ਗੁਲਜ਼ਾਰ ਬਾਰੇ ਸੋਚਦਾ ਹਾਂ

ਤੂੰ ਕਹੇਂ ਤੂੰ ਸੋਚ ਅਪਣੇ ਆਪ ਬਾਰੇ,
ਮੈਂ ਕਹਾਂ, ਮੈਂ ਯਾਰ ਬਾਰੇ ਸੋਚਦਾ ਹਾਂ

ਲੋਕ ਜਾ ਕੇ ਬਾਗ਼ ਵਿਚ ਫੁੱਲਾਂ ਦੀ ਸੋਚਣ,
ਮੈਂ ਹਮੇਸ਼ਾ, ਖ਼ਾਰ ਬਾਰੇ ਸੋਚਦਾ ਹਾਂ

ਹਰ ਧਡ਼ੇ ਵਿਚ ਨੇ ਬੁਰੇ ਕਿਰਦਾਰ ਵਾਲੇ ,
ਕੀ ਬਣੂ, ਸਰਕਾਰ ਬਾਰੇ ਸੋਚਦਾ ਹਾਂ

ਸੋਚ ਜਿਸਦੀ ਹੈ ਕਮੀਨੀ, ਉਹ ਭਲਾ ਫਿਰ,
ਕੀ ਕਰੂ, ਫ਼ਨਕਾਰ ਬਾਰੇ ਸੋਚਦਾ ਹਾਂ

ਧਰਮ ਅੰਮ੍ਰਿਤ ਹੈ ਪਰ ਇਸ ਦੇ ਨਾਂ ਤੇ ਹੁੰਦੇ,
ਵਿਸ਼-ਭਰੇ, ਪਰਚਾਰ ਬਾਰੇ ਸੋਚਦਾ ਹਾਂ

ਇਹ ਤੇਰੀ ਮਰਜ਼ੀ, ਇਹ ਕਦੋਂ ਇਨਕਾਰ ਕਰਨੈ,
ਮੈਂ ਅਜੇ , ਇਕਰਾਰ ਬਾਰੇ ਸੋਚਦਾ ਹਾਂ

ਰੋਕ ਲੈਂਦੇ ਨੇ ਮੇਰੇ ਜਜ਼ਬਾਤ ਮੈਨੂੰ,
ਜਦ ਕਦੇ, ਇਜ਼ਹਾਰ ਬਾਰੇ ਸੋਚਦਾ ਹਾਂ

ਫਿਰ ਉਦ੍ਹੀ ਤਸਵੀਰ ਵੀ ਬੇਕਾਰ ਜਾਪੇ,
ਜਦ ਉਦ੍ਹੇ , ਕਿਰਦਾਰ ਬਾਰੇ ਸੋਚਦਾ ਹਾਂ

ਬੇਵਫ਼ਾ ਨਹੀਂ ਆਖਿਆ ਅਜ ਤਕ ਕਿਸੇ ਨੂੰ,
ਆਪਣੇ ਵਿਵਹਾਰ ਬਾਰੇ ਸੋਚਦਾ ਹਾਂ

ਇਹ ਕਰੇਗਾ ਮਾਰ ਇਕ ਦਿਨ, ਲਾਜ਼ਮੀ ਹੈ,
ਕਲਮ ਦੇ ਹਥਿਆਰ ਬਾਰੇ ਸੋਚਦਾ ਹਾਂ

ਭੇਤ ਪਹਿਲਾਂ ਪਾ ਲਵਾਂ, ਕੀ ਇਸ਼ਕ ਹੁੰਦੈ,
ਫੇਰ ਕੁਝ ਜਿੱਤ -ਹਾਰ ਬਾਰੇ ਸੋਚਦਾ ਹਾਂ

ਫਿਰ ਕਦੇ ਸੰਸਾਰ ਬਾਰੇ ਗੱਲ ਕਰਾਂਗੇ ,
ਮੈਂ ਅਜੇ ਘਰ-ਬਾਰ ਬਾਰੇ ਸੋਚਦਾ ਹਾਂ

ਦਿਲ ਕਹੇ, ਕਰ ਯਾਦ ਪਹਿਲਾਂ ਫਰਜ਼ ਮਹਿਰਮ,
ਮੈਂ ਜਦੋਂ ਅਧਿਕਾਰ ਬਾਰੇ ਸੋਚਦਾ ਹਾਂ ।

ਨਿਹੱਥਾ ਨਾ ਸਮਝ ਖੁਦ ਨੂੰ .................

2010-06-30T01:09:00.000-07:00

ਗ਼ਜ਼ਲ .........................

ਜਿਵੇਂ ਸਤਿਕਾਰ ਚਾਹੁੰਨਾ ਏਂ , ਉਵੇਂ ਸਤਿਕਾਰ ਕਰਿਆ ਕਰ

ਤੂੰ ਬੰਦਾ ਏਂ ਤਾਂ ਬੰਦੇ ਵਾਂਗ ਹੀ ਵਿਵਹਾਰ ਕਰਿਆ ਕਰ

ਕਦੇ ਵੀ ਬਹਿਸ ਨਈਂ ਕਹਿੰਦੀ ਕਿ ਸ਼ਿਸ਼ਟਾਚਾਰ ਭੁੱਲ ਜਾਵੋ ,

ਤੂੰ ਐਵੇਂ ਜੋਸ਼ ਵਿੱਚ ਆ ਕੇ ਨ ਹੱਦਾਂ ਪਾਰ ਕਰਿਆ ਕਰ

ਕਦੇ ਇਨਕਾਰ ਕਰਦਾ ਏਂ , ਕਦੇ ਇਕਰਾਰ ਕਰਦਾ ਏਂ ,

ਜੋ ਚੱਲਦਾ ਹੈ ਤੇਰੇ ਦਿਲ ਵਿੱਚ ਉਦ੍ਹਾ ਇਜ਼ਹਾਰ ਕਰਿਆ ਕਰ

ਤੂੰ ਅਪਣੀ ਹੀ ਕਿਸੇ ਗੱਲ ਤੇ ਲਡ਼ੇਂ ਤਾਂ ਨਈਂ ਗਿਲਾ ਮੈਨੂੰ ,

ਰਕੀਬਾਂ ਲਈ ਮੇਰੇ ਸੰਗ ਨਾ ਕਦੇ ਤਕਰਾਰ ਕਰਿਆ ਕਰ

ਇਹ ਵੀ ਸੱਚ ਹੈ ਕਿ ਸਭ ਤੇ ਤਾਂ ਭਰੋਸਾ ਹੋ ਨਹੀਂ ਸਕਦਾ ,

ਮਗਰ ਜੋ ਤੈਨੂੰ ਚਾਹੁੰਦਾ ਹੈ ਉਦ੍ਹਾ ਇਤਬਾਰ ਕਰਿਆ ਕਰ

ਅਜ਼ਲ ਤੋਂ ਹੀ ਮੁਹੱਬਤ ਨੂੰ ਗੁਨਾਹ ਗਿਣਿਆ ਹੈ ਦੁਨੀਆਂ ਨੇ,

ਪਤਾ ਨਈਂ ਕਿਉਂ ਕਹੇ ਰਹਿਬਰ ਕਿ ਸਭ ਨੂੰ ਪਿਆਰ ਕਰਿਆ ਕਰ

ਨਿਹੱਥਾ ਨਾ ਸਮਝ ਖੁਦ ਨੂੰ ਕਲਮ ਜੇ ਕੋਲ ਹੈ ਤੇਰੇ ,

ਜਦੋਂ ਵੀ ਜੁਰਮ ਤੂੰ ਤੱਕੇਂ ਕਲਮ ਦਾ ਵਾਰ ਕਰਿਆ ਕਰ

ਜ਼ਮਾਨੇ ਵਿੱਚ ਭਲੇ ਦਾ ਹੁਣ ਸਮਾਂ ਤਾਂ ਨਈਂ ਰਿਹਾ ਮਹਿਰਮ

ਮਗਰ ਜੇ ਹੋ ਸਕੇ ਤੈਥੋਂ , ਤਾਂ ਪਰਉਪਕਾਰ ਕਰਿਆ ਕਰ

ਗ਼ਜ਼ਲ --ਉਡੀਕੇ ਰਾਤ ਦਿਨ ..............................

2010-05-10T20:02:00.000-07:00

ਗ਼ਜ਼ਲ ................................

ਉਹ ਆਕੜ ਵਿਚ ਸਹੇ ਦੇ ਵਾਂਗ ਰਾਹ ਵਿਚ ਬਹਿ ਗਿਆ ਹੋਣੈ
ਸਮੇਂ ਦੀ ਦੌੜ ਚੋਂ ਪਿੱਛੇ ਉਹ ਤਾਂ ਹੀ ਰਹਿ ਗਿਆ ਹੋਣੈ

ਕਦੇ ਭਾਵੁਕ , ਕਦੇ ਮਜ਼ਬੂਰ ਕਰਦੇ ਨੇ ਕਿਵੇਂ ਰਿਸ਼ਤੇ ,
ਬੜਾ ਕੁਝ ਸੋਚਦਾ ਇਸ ਵਹਿਣ ਵਿਚ ਉਹ ਵਹਿ ਗਿਆ ਹੋਣੈ

ਜ਼ਮਾਨੇ ਦੇ ਸਿਤਮ ਅੱਗੇ, ਜਿਨ੍ਹਾਂ ਦੀ ਪੇਸ਼ ਨਾ ਚੱਲੀ ,
ਬਣਾਇਆ ਮਹਿਲ ਖਾਬਾਂ ਦਾ , ਉਨ੍ਹਾਂ ਦਾ ਢਹਿ ਗਿਆ ਹੋਣੈ

ਇਸੇ ਕਰਕੇ ਤੁੰ ਮੰਦਾ ਬੋਲਿਐ ਉਸਨੂੰ ਬਿਨਾਂ ਦੋਸ਼ੌਂ ,
ਕਦੇ ਪਹਿਲਾਂ ਉਹ ਚੁੱਪ ਕਰਕੇ ਬੜਾ ਕੁਝ ਸਹਿ ਗਿਆ ਹੋਣੈ

ਜੋ ਤੁਰਿਆ ਤੋੜ ਕੇ ਬੰਧਨ , ਮੁਕਾ ਕੇ ਸਾਂਝ ਦੇ ਰਿਸ਼ਤੇ ,
ਪਿਛਾਂਹ ਤੱਕਦਾ ਸੀ ਉਹ ਮੁੜ ਮੁੜ , ਅਜੇ ਕੁਝ ਰਹਿ ਗਿਆ ਹੋਣੈ

ਗਿਆ ਗ਼ਮਗੀਨ ਸੀ, ਮੁੜਿਐ ਤਾਂ ਹੌਲਾ ਫੁੱਲ ਜਿਹਾ ਲੱਗਿਆ,
ਸੁਣਾ ਕੇ ਯਾਰ ਨੂੰ ਦੁੱਖ , ਭਾਰ ਦਿਲ ਤੋਂ ਲਹਿ ਗਿਆ ਹੋਣੈ

ਉਨ੍ਹਾਂ ਦੀ ਅੱਖ ਚ ਕੰਕਰ ਵਾਂਗ ਰੜਕੇਂ ਨਾ ਕਿਵੇਂ ਤੂੰ ਵੀ ,
ਤੇਰਾ ਸੱਚ ਵੀ ਉਨ੍ਹਾਂ ਦੇ ਝੂਠ ਦੇ ਸੰਗ ਖਹਿ ਗਿਆ ਹੋਣੈ

ਉਡੀਕੇ ਰਾਤ ਦਿਨ 'ਮਹਿਰਮ', ਨਿਗਾਹ ਰੱਖਦੈ ਬਰੂਹਾਂ ਤੇ ,
'ਮੈਂ ਪਰਤਾਂਗਾ', ਕੋਈ ਉਸਨੂੰ ਕਦੇ ਇਹ ਕਹਿ ਗਿਆ ਹੋਣੈ
=========================== /

ਗ਼ਜ਼ਲ ................................

2010-03-15T23:26:00.000-07:00

ਗ਼ਜ਼ਲ

......................................

ਨਹੀਂ ਹੁੰਦੀ , ਨਹੀਂ ਹੁੰਦੀ , ਕਿ ਛੱਡ ਉਲਫ਼ਤ ਨਹੀਂ ਹੁੰਦੀ ।

ਕਿਸੇ ਦੇ ਨਾਲ ਵੀ ਮੈਥੋਂ ਤਾਂ ਹੁਣ ਨਫ਼ਰਤ ਨਹੀਂ ਹੁੰਦੀ ।

ਮੇਰੇ ਇਜ਼ਹਾਰ ਨੂੰ ਉਸ ਨੇ, ਪਤਾ ਨਈਂ ਕਿਸ ਤਰ੍ਹਾਂ ਲੈਣਾ ,

ਕਦੇ ਉਸ ਨਾਲ ਖੁੱਲ੍ਹ ਕੇ ਗੱਲ ਕਰਾਂ, ਹਿੰਮਤ ਨਹੀਂ ਹੁੰਦੀ ।

ਅਸੀਸਾਂ ਤੇ ਦੁਆਵਾਂ ਦੀ ਬੜੀ ਅਨਮੋਲ ਹੈ ਦੌਲਤ ,

ਇਹ ਮਿਲਦੀ ਹੈ ਬਜ਼ੁਰਗਾਂ ਤੋਂ, ਇਹਦੀ ਕੀਮਤ ਨਹੀਂ ਹੁੰਦੀ ।

ਉਹ ਬੰਦਾ ਕੱਲਾ - ਕੈਰੈ, ਪਰ ਉਸਾਰੀ ਮਹਿਲ ਜਾਂਦਾ ਏ,

ਨਿਰੀ ਬਿਲਡਿੰਗ ਹੀ ਤਾਂ ਦੁਨੀਆਂ ਦੇ ਵਿੱਚ ਸ਼ੁਹਰਤ ਨਹੀਂ ਹੁੰਦੀ ।

ਜਦੋਂ ਪਾਸਾ ਪਵੇ ਉਲਟਾ, ਉਦਾਸੀ ਛਾ ਹੀ ਜਾਂਦੀ ਹੈ ,

ਹਮੇਸ਼ਾ ਖੁਸ਼ ਰਹੇ ਦਿਲ, ਕਿਸਦੀ ਇਹ ਹਸਰਤ ਨਹੀਂ ਹੁੰਦੀ ।

ਨਾ ਦੂਜੇ ਦਾ ਭਲਾ ਹੁੰਦੈ, ਨਾ ਰਹਿੰਦੈ ਸ਼ਾਂਤ ਮਨ ਅਪਣਾ,

ਬਹਾਨੇ ਲਾਉਣ ਦੀ ਆਦਤ ਖ਼ਰੀ ਆਦਤ ਨਹੀਂ ਹੁੰਦੀ ।

ਬਗ਼ਾਵਤ ਹੱਕ ਲਈ ਕਰੀਏ ਤਾਂ ਇਹ ਮਿਹਣਾ ਨਹੀਂ ਹੁੰਦਾ,

ਮਗਰ ਹੱਕ ਮੰਗਣਾ, ਹਰ ਇੱਕ ਦੀ ਕਿਸਮਤ ਨਹੀਂ ਹੁੰਦੀ ।

ਕਦੋਂ ਆਵੇ , ਕਿਵੇਂ ਆਵੇ , ਉਹ ਆਵੇਗੀ ਬਿਨਾਂ ਦੱਸਿਆਂ ,

ਕਿਸੇ ਦੀ ਮੌਤ ਦਾ ਕਾਰਨ, ਘੜੀ, ਸੂਚਿਤ ਨਹੀਂ ਹੁੰਦੀ ।

ਉਨ੍ਹਾਂ ਨੇ ਹੱਥ ਮਿਲਾਏ ਨੇ , ਮਿਲਾਏ ਉੱਪਰੋਂ - ਉੱਪਰੋਂ,

ਕਿ ਮੌਕਾ-ਪ੍ਰਸਤ ਲੋਕਾਂ ਵਿੱਚ ਦਿਲੀ-ਇੱਜਤ ਨਹੀਂ ਹੁੰਦੀ ।

ਜੋ ਤੁਰਦੇ ਨੇ ਭਲੇ ਖ਼ਾਤਿਰ, ਉਹ ਹੱਦਬੰਦੀ ਨਹੀਂ ਕਰਦੇ ,

ਕਿਸੇ ਉਪਕਾਰ ਦੀ ਸੀਮਾ, ਕਦੇ ਸੀਮਤ ਨਹੀਂ ਹੁੰਦੀ ।

ਉਹ ਕੱਲੇ - ਕੱਲੇ ਹੋ ਕੇ ਜ਼ੁਲਮ ਸਹਿੰਦੇ ਜਾਂਦੇ ਨੇ 'ਮਹਿਰਮ',

ਜੇ ਇੱਕ ਜੁੱਟ ਹੋ ਗਏ ਹੁੰਦੇ, ਤਾਂ ਇਹ ਹਾਲਤ ਨਹੀਂ ਹੁੰਦੀ ।

===============================

2010-02-07T04:11:00.001-08:00

ਗ਼ਜ਼ਲ--- ਮੁਹੱਬਤ ਦਾ ਕਰਿਸ਼ਮਾ ..........

ਗ਼ਜ਼ਲ.......................

ਉਦ੍ਹੇ ਸਿਰ ਬੇਵਜ੍ਹਾ ਫਿਰ ਦੋਸ਼ ਲੱਗਿਆ ਹੈ ।

ਭਲਾ ਨੈਣਾਂ 'ਚੋਂ ਐਵੇਂ ਨੀਰ ਵਗਦਾ ਹੈ ।

ਇਹ ਜਾਦੂ ਜਾਂ ਮੁਹੱਬਤ ਦਾ ਕਰਿਸ਼ਮਾ ਹੈ ।

ਉਨ੍ਹੇ ਹਰ ਗ਼ਮ ਖ਼ੁਸ਼ੀ ਦੇ ਨਾਲ ਜਰਿਆ ਹੈ ।

ਜੁਦਾ ਹੋ ਕੇ, ਕੀ ਹੋਈ ਹੈ , ਦਸ਼ਾ ਦਿਲ ਦੀ,

ਇਹ ਸੈਆਂ ਵਾਰ ਭਰਿਆ ਹੈ ਤੇ ਫਿੱਸਿਆ ਹੈ ।

ਮਲਾਹਾਂ ਨੇ ਨਹੀਂ ਤੱਕਿਆ ਪਿਛਾਂਹ ਮੁੜ ਕੇ,

ਜੋ ਗਿਰਿਆ ਸੀ, ਉਹ ਡੁੱਬਿਆ ਹੈ ਕਿ ਤਰਿਆ ਹੈ ।

ਦਿਲਾਂ ਦੇ ਤਾਰ ਕੱਚੇ ਧਾਗਿਆਂ - ਵੱਤ ਨੇ ,

ਇਹ ਟੁੱਟੇ ਨੇ, ਜਦੋਂ ਵਿਸਵਾਸ਼ ਟੁੱਟਿਆ ਹੈ ।

ਹਰਿਕ ਰਿਸ਼ਤਾ ਪਿਆਦੇ ਵਾਂਗ ਵਰਤੇ ਉਹ,

ਹਮੇਸ਼ਾ 'ਚੈੱਸ' ਜਿਹੀ ਉਹ ਚਾਲ ਚੱਲਦਾ ਹੈ ।

ਨਹੀਂ ਛਡ ਸਕਦਾ ਸੌੜੀ ਸੋਚ ਦਾ ਪੱਲਾ,

ਉਨ੍ਹੇ ਅਪਣੇ ਲਈ ਖ਼ੁਦ ਜਾਲ ਬੁਣਿਆ ਹੈ ।

ਅਜੇਹਾ ਮੋੜ ਵੀ ਆਉਂਦੈ ਮੁਹੱਬਤ ਵਿੱਚ,

ਕਿ ਬੰਦਾ ਸੋਚਦੈ , ਜਿੱਤਿਆ ਕਿ ਹਰਿਆ ਹੈ ।

ਖਿਸਕ ਜਾਂਦੈ ਉਹ ਅਪਣੇ ਆਪ ਹੀ ਦਿਲ 'ਚੋਂ,

ਭੁਲਾਇਆਂ ਵੀ ਕਦੇ ਮਹਿਬੂਬ ਭੁੱਲਿਆ ਹੈ ।

ਜਦੋਂ ਫਸਿਆ ਤਾਂ ਜਾਣੇਗਾ ਕਦਰ ਇਸਦੀ ,

ਅਜੇ ਉਪਦੇਸ਼ ਉਸ ਨੂੰ ਬੋਝ ਲੱਗਦਾ ਹੈ ।

ਕਿਵੇਂ ਨਾ ਗੀਤ ਗਾਵੇ ਉਹ ਮੁਹੱਬਤ ਦੇ,

ਚਿਰਾਂ ਮਗਰੋਂ ਉਦ੍ਹਾ ਮਹਿਬੂਬ ਮਿਲਿਆ ਹੈ ।

=====================

ਹੁੰਦੇ ਹੋਏ ਵੀ ..........

2010-01-22T06:58:00.000-08:00

ਗ਼ਜ਼ਲ .........................

ਮੁਹੱਬਤ ਵਿੱਚ ਦਗ਼ਾ ਹੁੰਦੇ ਹੋਏ ਵੀ

ਉਹ ਚੁੱਪ ਰਹਿੰਦੈ ਪਤਾ ਹੁੰਦੇ ਹੋਏ ਵੀ

ਕੋਈ ਸ਼ਿਕਵਾ ਗਿਲਾ ਹੁੰਦੇ ਹੋਏ ਵੀ

ਉਹ ਖ਼ੁਸ਼ ਰਹਿੰਦੈ ਜੁਦਾ ਹੁੰਦੇ ਹੋਏ ਵੀ

ਉਦ੍ਹੇ ਬਾਰੇ ਨਹੀਂ ਕੁਝ ਜਾਣਦਾ ਮੈਂ

ਬੜਾ ਕੁਝ ਜਾਣਦਾ ਹੁੰਦੇ ਹੋਏ ਵੀ

ਸ਼ਰਾਰਤ ਇਸ ਤਰ੍ਹਾਂ ਕੀਤੀ ਹਵਾ ਨੇ

ਨਹੀਂ ਪਰਦਾ ਰਿਹਾ ਹੁੰਦੇ ਹੋਏ ਵੀ

ਦਿਨੋ ਦਿਨ ਦੂਰ ਹੁੰਦੇ ਜਾ ਰਹੇ ਹਾਂ

ਮੁਸੱਲਸਲ ਰਾਬਤਾ ਹੁੰਦੇ ਹੋਏ ਵੀ

ਕਿਤੇ ਵੀ ਨਈਂ ਕਦੇ ਮਿਲਦਾ ਕਿਸੇ ਨੂੰ

ਹਰਿਕ ਥਾਂ 'ਤੇ ਖ਼ੁਦਾ ਹੁੰਦੇ ਹੋਏ ਵੀ

ਦਵਾ ਦੇਣੋਂ ਉਨ੍ਹਾਂ ਪਰਹੇਜ਼ ਰੱਖਿਆ

ਮੇਰੇ ਦੁੱਖ ਦਾ ਪਤਾ ਹੁੰਦੇ ਹੋਏ ਵੀ

ਕਦੇ ਵੀ ਨਾ ਭਲਾ ਕੀਤਾ ਕਿਸੇ ਦਾ

ਉਹ ਰੋਂਦਾ ਹੀ ਰਿਹਾ ਹੁੰਦੇ ਹੋਏ ਵੀ

ਮੁਹੱਬਤ ਹੈ ਤਦੇ ਇੰਜ ਮਾਫ਼ ਕਰਦੈ

ਉਹ ਹੱਸ ਪੈਂਦੈ ਖਫ਼ਾ ਹੁੰਦੇ ਹੋਏ ਵੀ

ਉਹ ਵਲ਼ ਪਾ ਕੇ ਨਿਕਲ ਜਾਂਦੈ ਹਮੇਸ਼ਾ

ਮੇਰੇ ਘਰ ਦਾ ਪਤਾ ਹੁੰਦੇ ਹੋਏ ਵੀ

ਨਹੀਂ ਪਲ ਦਾ ਭਰੋਸਾ ਵੀ ਦਮਾਂ 'ਤੇ

ਦਮਾਂ ਦਾ ਆਸਰਾ ਹੁੰਦੇ ਹੋਏ ਵੀ

ਪਤਾ ਨਈਂ ਕਿਉਂ ਨਹੀਂ ਜਾਂਦਾ ਦਿਲਾਂ 'ਚੋਂ

ਵਫ਼ਾ 'ਤੇ ਸ਼ੱਕ ਵਫ਼ਾ ਹੁੰਦੇ ਹੋਏ ਵੀ

ਮੁਹੱਬਤ ਵਿਚ ਸਦਾ ਮਹਿਬੂਬ 'ਮਹਿਰਮ'

ਭਲਾ ਲੱਗਦੈ ਬੁਰਾ ਹੁੰਦੇ ਹੋਏ ਵੀ

=================== ਜਸਵਿੰਦਰ ਮਹਿਰਮ /

ਗ਼ਜ਼ਲ---ਤੁਸੀਂ ਸਭ ਕੁਝ ਬੜਾ ਦਿਤੈ .......

2009-11-23T06:49:00.001-08:00

ਗ਼ਜ਼ਲ.................................................

ਉਨੂੰ ਮਿਲਣਾ ਝਨਾਂ ਤੋਂ ਪਾਰ ਜਾ ਕੇ ਸੀ , ਨਹੀਂ ਮਿਲਿਆ
ਰਿਹਾਂ ਮੰਝਧਾਰ ਵਿਚ ਫਸਿਆ, ਕਿਨਾਰਾ ਹੀ ਨਹੀਂ ਮਿਲਿਆ

ਮਨਾਂ ਤੇ ਬੋਝ, ਖਾਲੀਪਨ , ਉਦਾਸੀ ਚਿਹਰਿਆਂ ਉੱਤੇ,
ਜੋ ਵੀ ਮਿਲਿਆ , ਬਿਨਾਂ ਇਸ ਤੋਂ, ਕਦੇ ਕੋਈ ਨਹੀਂ ਮਿਲਿਆ

ਮੈਂ ਇਹ ਤਾਂ ਕਹਿ ਨਹੀਂ ਸਕਦਾ, ਕਿਸੇ ਤੋਂ ਪਿਆਰ ਮਿਲਿਆ ਨਈਂ,
ਮਗਰ ਮੈਨੂੰ , ਜਦੋਂ ਇਸਦੀ , ਜ਼ਰੂਰਤ ਸੀ , ਨਹੀਂ ਮਿਲਿਆ

ਜੁਦਾਈ, ਬੇਬਸੀ, ਗ਼ਮ, ਦਰਦ , ਧੋਖਾ , ਬੇਰੁਖੀ ਯਾਰੋ ,
ਤੁਸੀਂ ਸਭ ਕੁਝ ਬੜਾ ਦਿਤੈ , ਤੁਹਾਥੋਂ ਕੀ ਨਹੀਂ ਮਿਲਿਆ

ਬਥੇਰੇ ਯਾਰ ਨੇ ਮੇਰੇ , ਬੜੇ ਗ਼ਮਖ਼ਾਰ ਨੇ ਮੇਰੇ ,
ਮਗਰ ਸੀ ਆਰਜ਼ੂ ਜਿਸਦੀ , ਉਹ ਹਾਲੇ ਵੀ ਨਹੀਂ ਮਿਲਿਆ

ਉਡਾਰੀ ਮਾਰ ਕੇ ਕਾਰੂੰ, ਸਿਕੰਦਰ ਛਿਪ ਗਿਆ ਕਿੱਥੇ ,
ਖ਼ਜ਼ਾਨਾ ਕੀ , ਉਦਾ ਘਰ ਜਿਸ ਗਲੀ ਵਿਚ ਸੀ, ਨਹੀਂ ਮਿਲਿਆ

ਰਿਹਾ ਮਸਰੂਫ਼ 'ਮਹਿਰਮ' ਪੀਣ ਵਿਚ ਜਾਂ ਹੋਰ ਕੰਮਾਂ ਵਿਚ,
ਮੇਰੀ ਮਹਿਫ਼ਿਲ 'ਚ ਆ ਕੇ ਵੀ, ਉਹ ਮੈਨੂੰ ਹੀ ਨਹੀਂ ਮਿਲਿਆ
========================= ਛਁ

ਗ਼ਜ਼ਲ........ਰਹਿਬਰ ਤਾਂ ਸਮਝਾਉਂਦੇ ਆਏ .......

2009-10-26T09:44:00.001-07:00

ਕੁਰਸੀ ਦੌੜ ' ਚ ਜਦ ਵੀ ਹੋਊ , ਉਹ ਹੀ ਸ਼ਾਮਿਲ ਹੋਵੇਗਾ ।
ਜੋ ਲੋਕਾਂ ਨੂੰ ਝੂਠੇ ਲਾਰੇ ਲਾਉਣ ਦੇ ਕਾਬਿਲ ਹੋਵੇਗਾ ।

ਕੋਸ਼ਿਸ਼ ਕਰ ਕੇ ਦੇਖ ਜ਼ਰਾ ਤੂੰ, ਅਪਣੀ ਮੰਜ਼ਿਲ ਪਾਉਣੀ ਜੇ,
ਜਿੱਤ ਨਹੀਂ ਤਾਂ 'ਹਾਰ" ਦਾ ਕਾਰਨ , ਕੁਝ ਤਾਂ ਹਾਸਿਲ ਹੋਵੇਗਾ ।

ਅਪਣੇ ਆਪ ਤਾਂ ਕੁਝ ਨਈਂ ਆਉਂਦੈ , ਸਭ ਕੁਝ ਸਿੱਖਣਾ ਪੈਂਦਾ ਹੈ,
ਉਸਨੂੰ ਮੰਜ਼ਿਲ ਮਿਲਣੀ ਜਿਸਦਾ , ਮੁਰਸ਼ਦ ਕਾਮਿਲ ਹੋਵੇਗਾ ।

ਉਸਨੇ ਅਪਣੀ ਰਾਖੀ ਖ਼ਾਤਿਰ , ਐਨੀ ਗਾਰਦ ਰੱਖੀ ਹੈ ,
ਸੋਚ ਲਵੋ ਲੋਕਾਂ ਦਾ ਨੇਤਾ , ਕਿੰਨਾ ਬੁਜ਼ਦਿਲ ਹੋਵੇਗਾ ।

ਫਿਰ ਤਾਂ ਕਿਸੇ ਬੇਦੋਸ਼ੇ ਨੂੰ ਹੀ , ਟੰਗਿਆ ਜਾਊ ਫਾਂਸੀ 'ਤੇ,
ਜੱਜਾਂ ਦੀ ਟੋਲੀ ਵਿੱਚ ਹੀ ਜੇ , ਬੈਠਾ ਕਾਤਿਲ ਹੋਵੇਗਾ ।

ਕੁੱਖ ਵਿੱਚ ਕਤਲ ਕਰਾ ਕੇ ਧੀ ਨੂੰ , ਪੁੱਤ ਦੇ ਸੁਪਨੇ ਲੈਂਦੀ ਜੋ,
ਐਸੀ ਮਾਂ ਦੇ ਸੀਨੇ ਵਿੱਚ ਤਾਂ , ਪੱਥਰ ਦਾ ਦਿਲ ਹੋਵੇਗਾ ।

ਤੇਰੀ ਮੰਜ਼ਿਲ ਪੂਰਬ ਹੈ ਤੇ ਮੇਰੀ ਮੰਜ਼ਿਲ ਪੱਛਮ ਹੈ ,
ਫੇਰ ਕਿਵੇਂ ਦੱਸ ਤੇਰਾ ਮੇਰਾ ਇਕ ਹੀ ਸਾਹਿਲ ਹੋਵੇਗਾ ।

ਪਲ ਵਿਚ ਮੁੱਖੜਾ ਮੋੜ ਗਿਆ ਏ, ' ਭੁੱਲ ਜਾ ਮੈਨੂੰ ' ਕਹਿ ਕੇ ਜੋ ,
ਉਹ ਕੀ ਜਾਣੇਂ ਉਸਨੂੰ ਭੁੱਲਣਾ , ਕਿੰਨਾ ਮੁਸ਼ਕਿਲ ਹੋਵੇਗਾ ।

ਟੇਡੇ ਮੇਡੇ ਰਾਹਾਂ 'ਤੇ ਵੀ , ਤੁਰਨਾ ਪੈਂਦਾ ਜੀਵਨ ਵਿਚ ,
ਕਦਮ ਕਦਮ 'ਤੇ ਠੋਕਰ ਖਾਊ , ਜੋ ਵੀ ਗਾਫ਼ਿਲ ਹੋਵੇਗਾ ।

ਰਹਿਬਰ ਤਾਂ ਸਮਝਾਉਂਦੇ ਆਏ , ਬੰਦਾ ' ਬੰਦਾ' ਬਣਿਆ ਨਈਂ,
ਆਸ ਨਹੀਂ ਸੀ ' ਮਹਿਰਮ ', ਬੰਦਾ ਏਨਾ ਜਾਹਿਲ ਹੋਵੇਗਾ ।
====================================

ਰਹਿਬਰਾਂ ਦਾ ਵਣਜ ਹੈ ਹੁਣ .............

2009-10-08T01:04:00.001-07:00

ਗ਼ਜ਼ਲ ...............

ਰਹਿਬਰਾਂ ਦਾ ਵਣਜ ਹੈ ਹੁਣ ਹਰ ਤਰਾਂ ਦੇ ਜ਼ਹਿਰ ਦਾ |
ਤੜਫਦਾ ਮਿਲਦੈ ਤਦੇ ਹਰ ਸਖ਼ਸ਼ ਮੇਰੇ ਸ਼ਹਿਰ ਦਾ |

ਚੋਰ - ਡਾਕੂ ਜਿਸ ਤਰਾਂ ਸਰਗਰਮ ਨੇ ਹੁਣ ਰਾਤ - ਦਿਨ ,
ਖ਼ੌਫ ਨੇ ਲੋਕਾਂ ਦਾ ਲੁੱਟਿਆ ਚੈਨ ਅੱਠੇ ਪਹਿਰ ਦਾ |

ਆੜ ਲੈ ਕੇ ਧਰਮ ਦੀ ਨਾ ਖੇਡ ਖੂਨੀ ਹੋਲੀਆਂ ,
ਹਰ ਕਿਸੇ ਨੂੰ ਸੇਕ ਲੱਗਦੈ, ਬੇਵਜ੍ਹਾ ਇਸ ਕਹਿਰ ਦਾ |

ਤੂੰ ਸਮੁੰਦਰ ਦਾ ਨਜ਼ਾਰਾ ਦੇਖਣਾ ਤਾਂ ਦੇਖ , ਪਰ ,
ਨਾ ਕਿਨਾਰੇ ਕੋਲ ਜਾਵੀਂ , ਕੀ ਭਰੋਸਾ ਲਹਿਰ ਦਾ |

ਖ਼ੁਦ ਚਿਰਾਗ਼ਾਂ ਨੂੰ ਖ਼ਬਰ ਨਈਂ ਆਪਣੀ ਔਕਾਤ ਦੀ ,
ਰੌਸ਼ਨੀ ਅੱਗੇ ਹਨੇਰਾ ਤਾਂ ਕਦੇ ਨਈਂ ਠਹਿਰਦਾ |

ਦੇਖ ਸੁੱਕੀ ਨਹਿਰ ਕਰਦੇ ਨੇ ਵਿਚਾਰਾਂ ਬਿਰਖ ਵੀ ,
ਇਸ ਤਰਾਂ ਪਹਿਲਾਂ ਕਦੇ ਰੁੱਸਿਆ ਨਈਂ ਪਾਣੀ ਨਹਿਰ ਦਾ |

ਕੀ ਗ਼ਜ਼ਲ ਦੇ ਐਬ ਦੇਖੂ , ਕੀ ਉਹ ਜਾਣੂ ਖ਼ੂਬੀਆਂ ?
ਜੋ ਨਿਯਮ ਹੀ ਜਾਣਦਾ ਨਈਂ ਰੁਕਨ ਦਾ ਜਾਂ ਬਹਿਰ ਦਾ |

ਜਾਣਦਾ ਹਾਂ ਤੂੰ ਬੜਾ ਮਸਰੂਫ਼ ਰਹਿਨੈ ' ਮਹਿਰਮਾ ',
ਪਰ ਕਦੇ ਤਾਂ ਵਕਤ ਕੱਢ ਲੈ , ਕੁਝ ਦਿਨਾਂ ਦੀ ਠਹਿਰ ਦਾ |

ਬਹਿ ਨਾ ' ਮਹਿਰਮ ' ਬੇਧਿਆਨਾ , ਸਾਂਭ ਗਠੜੀ ਆਪਣੀ ,
ਆ ਰਿਹੈ ਤੂਫ਼ਾਨ ਚੜ੍ਹ ਕੇ , ਹੈ ਇਸ਼ਾਰਾ ਗਹਿਰ ਦਾ |
===================================

ਬੜਾ ਕੁਝ ਦਿਲ 'ਚ ਰੱਖਦੇ ਹਾਂ ==========

2009-09-12T00:46:00.000-07:00

ਗ਼ਜ਼ਲ
ਜ਼ਰੂਰੀ ਤਾਂ ਨਹੀਂ ਆਵੇ ਨਜ਼ਰ ਕੁਝ ਹਾਦਸੇ ਵਰਗਾ
ਬੜਾ ਕੁਝ ਦਿਲ 'ਚ ਰੱਖਦੇ ਹਾਂ ਛਿਪਾ ਕੇ ਜ਼ਲਜ਼ਲੇ ਵਰਗਾ

ਚਮਕ ਚਿਹਰੇ 'ਤੇ ਹੁੰਦੀ ਏ ਖ਼ੁਸ਼ੀ ਵੇਲੇ ਸੁਬਹ ਵਰਗੀ ,
ਗ਼ਮੀ ਹੋਵੇ ਤਾਂ ਇਸਦਾ ਹਾਲ ਹੁੰਦਾ ਦਿਨ ਢਲੇ ਵਰਗਾ

ਸਮਾਂ ਤਾਂ ਕੱਟ ਲੈਂਦਾ ਆਦਮੀ ਸਬ ਨਾਲ ਪਰ ਫਿਰ ਵੀ ,
ਉਹ ਸਾਥੀ ਭਾਲਦਾ ਰਹਿੰਦੈ ਸਦਾ ਹੀ ਆਪਣੇ ਵਰਗਾ

ਤੁਰਾਂਗੇ ਸਾਥ ਰਲ ਮਿਲ ਕੇ , ਕਸਮ ਉਹ ਖਾਣਗੇ, ਲੇਕਿਨ ,
ਉਨ੍ਹਾਂ ਦੇ ਦਿਲ 'ਚ ਛੁਪਿਆ ਹੈ ਬੜਾ ਕੁਝ ਫਾਸਲੇ ਵਰਗਾ

ਨਾ ਐਸਾ ਮਸ਼ਵਰਾ ਦੇਵੋ ਜੋ ਦਿਲ ਨੂੰ ਤੋੜ ਹੀ ਦੇਵੇ ,
ਅਜੇਹਾ ਮਸ਼ਵਰਾ ਦੇਵੋ , ਜੋ ਹੋਵੇ ਹੌਸਲੇ ਵਰਗਾ

ਉਨ੍ਹਾਂ ਦੀ ਪਹੁੰਚ ਤੋਂ ਮੰਜ਼ਿਲ ਕਦੇ ਵੀ ਦੂਰ ਨਹੀਂ ਰਹਿੰਦੀ ,
ਜਿਨ੍ਹਾਂ ਦਾ ਜੋਸ਼ ਹੋਵੇ ਢੋਲ 'ਤੇ ਲੱਗੇ ਡਗੇ ਵਰਗਾ

ਕੁਰਾਹੇ ਪੈ ਗਿਆ ਜੋ , ਹੁਣ ਇਸ਼ਾਰਾ ਕੀ ਭਲਾ ਸਮਝੂ ,
ਨਸੀਹਤ ਵਾਸਤੇ ਵੀ ਉਹ ਤਾਂ ਹੈ ਚਿਕਨੇ ਘੜੇ ਵਰਗਾ

ਜਿਦ੍ਹੇ 'ਤੇ ਮਾਣ ਹੈ , ਹੱਕ ਹੈ, ਮੁਹੱਬਤ ਹੈ , ਮੁਨਾਸਿਬ ਹੈ ,
ਕਦੇ ਮੈਂ ਬੋਲ ਵੀ ਬੋਲਾਂ ਉਨੂੰ ਗੁੱਸੇ ਗਿਲੇ ਵਰਗਾ

ਕਿਵੇਂ ਉਪਕਾਰ ਕਰ ਸਕਦੈ , ਦੁਬਾਰਾ ਉਸ ਜਗਹ ਕੋਈ,
ਜਰੂਰਤ ਪੈਣ 'ਤੇ ਜਿੱਥੋਂ , ਜਵਾਬ ਆਵੇ ਟਕੇ ਵਰਗਾ

ਕਰੀਂ ਉਸਦਾ ਭਲਾ ਰੱਬਾ , ਮੇਰੇ ਦਿਲ 'ਚੋਂ ਦੁਆ ਨਿਕਲੀ,
ਉਹ ਕਰਦਾ ਹੈ ਬੁਰਾ ਬੇਸ਼ੱਕ , ਬੁਰਾ ਕਰਦੈ ਭਲੇ ਵਰਗਾ

ਪੁਜਾਰੀ ਪਿਆਰ ਦਾ ਬਣਕੇ , ਮੁਨਾਫ਼ਾ ਭਾਲਦੈ ਇਸ 'ਚੋਂ ,
ਨਹੀਂ ਇਹ ਮਾਮਲਾ ਉਸਦਾ , ਦਿਲਾਂ ਦੇ ਮਾਮਲੇ ਵਰਗਾ

ਕਿਸੇ ਨੂੰ ਖੂਨ ਦਾ ਰਿਸ਼ਤਾ ਵੀ ਕਦ ਤਕ ਜੋੜ ਕੇ ਰੱਖੂ ,
ਹਮੇਸ਼ਾ ਹੀ ਰਹੇ ਜਿਸਦਾ , ਵਤੀਰਾ ਓਪਰੇ ਵਰਗਾ

ਛੁਪਾ ਕੇ ਗ਼ਮ, ਖ਼ੁਸ਼ੀ ਵੰਡੇ , ਖ਼ਤਾ ਬਦਲੇ ਵਫ਼ਾ ਪਾਲੇ ,
ਮਿਲੇ ਜਦ ਵੀ, ਮੇਰਾ ਮਹਿਰਮ , ਮਿਲੇ ' ਮਹਿਰਮ ' ਤੇਰੇ ਵਰਗਾ =====================================

2009-08-27T10:00:00.000-07:00

.........--- ਕਿਸੇ ਤੋਂ ਧੀ ਕਦੇ ਅਪਣੀ ..........
ਗ਼ਜ਼ਲ.......................
ਉਦੇ ਕੋਲੋਂ ਮੇਰੀ ਕੋਈ, ਖੁਸ਼ੀ, ਦੇਖੀ ਨਹੀਂ ਜਾਂਦੀ
ਮਗਰ ਮੈਥੋਂ ਉਦੀ ਕੋਈ, ਗ਼ਮੀ, ਦੇਖੀ ਨਹੀਂ ਜਾਂਦੀ

ਉਦੀ ਬਣਦੀ ਨਹੀਂ ਦੇਖੀ, ਕਿਸੇ ਦੇ ਨਾਲ ਅੱਜ ਤਕ ਮੈਂ,
ਉਦੇ ਕੋਲੋਂ ਕਿਸੇ ਦੀ ਵੀ , ਬਣੀ , ਦੇਖੀ ਨਹੀਂ ਜਾਂਦੀ

ਕਦੇ ਸੁੱਖ ਪਾ ਨਹੀਂ ਸਕਦੇ ਉਹ ਲੜਕੇ ਤੋਂ ਜਿਨ੍ਹਾਂ ਕੋਲੋਂ ,
ਬਹੂ ਦੇ ਪੇਟ ਵਿਚ ਪਲਦੀ , ਕੁੜੀ, ਦੇਖੀ ਨਹੀਂ ਜਾਂਦੀ

ਵਜਾਉਂਦਾ ਢੋਲ ਹੈ ਹਾਕਮ , ਭਲਾ ਕਿਸਦੀ ਤਰੱਕੀ ਦਾ ,
ਜੋ ਹਾਲਤ ਹੈ ਗ਼ਰੀਬਾਂ ਦੀ , ਸੁਣੀ-ਦੇਖੀ ਨਹੀਂ ਜਾਂਦੀ

ਬੜਾ ਸੜੀਅਲ ਸੁਭਾਅ ਰੱਖਦਾ ਹੈ ਮਾਰੂਥਲ ਉਦੇ ਕੋਲੋਂ,
ਵਗੇ ਭਰਕੇ ਕੋਈ ਦਰਿਆ - ਨਦੀ , ਦੇਖੀ ਨਹੀਂ ਜਾਂਦੀ

ਪਰਾਈ ਆਖ ਕੇ ਐਵੇਂ , ਬਹੂ ਨੂੰ ਨਾ ਸਤਾ ਏਨਾ ,
ਕਿਸੇ ਤੋਂ ਧੀ ਕਦੇ ਅਪਣੀ, ਦੁਖੀ , ਦੇਖੀ ਨਹੀਂ ਜਾਂਦੀ

ਪੁਰਾਣੇ ਛੇੜ ਕੇ ਕਿੱਸੇ , ਕਲਾ ਸੁੱਤੀ ਜਗਾਉਂਦੈ ਉਹ ,
ਮੇਰੀ ਹਾਲਤ ਜਦੋਂ ਚੰਗੀ - ਭਲੀ, ਦੇਖੀ ਨਹੀਂ ਜਾਂਦੀ

ਮੁਹੱਬਤ ਕਰ ਤੂੰ ਬਸ ਏਨੀ , ਕਿ ਸਾਰੀ ਉਮਰ ਨਿਭ ਜਾਵੇ,
ਮੁਹੱਬਤ ਵਿਚ ਜਦੋਂ ਰੜਕੇ , ਕਮੀ , ਦੇਖੀ ਨਹੀਂ ਜਾਂਦੀ

ਜੁਦਾ ਹੁੰਦਿਆਂ ਕਦੇ ਤਾਂ ਮੁਸਕਰਾਕੇ ਕਰ ਵਿਦਾ ਮੈਨੂੰ ,
ਤੇਰੇ ਨੈਣਾਂ 'ਚ ਹਰ ਵਾਰੀ , ਨਮੀ , ਦੇਖੀ ਨਹੀਂ ਜਾਂਦੀ

ਉਹ ਵੈਸੇ ਦਮ ਬੜਾ ਭਰਦੈ , ਹਿਤੈਸ਼ੀ ਹੋਣ ਦਾ ' ਮਹਿਰਮ ',
ਉਹ ਰੱਖਦਾ ਹੈ ਜਿਵੇਂ ਦਿਲ ਵਿਚ , ਬਦੀ , ਦੇਖੀ ਨਹੀਂ ਜਾਂਦੀ
=================================

ਸਵੇਰੇ ਦਾ ਘਰੋਂ ਤੁਰਿਆ ....................

2009-08-07T07:46:00.000-07:00

ਗ਼ਜ਼ਲਮੇਰੇ ਸੰਗ ਤਾਂ ਹਮੇਸ਼ਾ ਹੀ ਅਜੇਹਾ ਹਾਦਸਾ ਹੋਇਆ
ਜਿਨ੍ਹਾਂ ਤੋਂ ਨੇੜਤਾ ਚਾਹੀ , ਉਨ੍ਹਾਂ ਤੋਂ ਫ਼ਾਸਲਾ ਹੋਇਆ

ਭੁਲਾ ਕੇ ਸਾਂਝ ਦੇ ਰਿਸ਼ਤੇ, ਉਹ ਛਿਪ ਕੇ ਬਹਿ ਗਿਆ ਕਿੱਥੇ ,
ਨਹੀਂ ਦਿਸਿਆ ਕਿਤੇ ਫਿਰਦਾ , ਨਾ ਮੁੜ ਕੇ ਰਾਬਤਾ ਹੋਇਆ

ਕਰੇ ਉਹ ਖੋਖਲਾ ਦਾਅਵਾ ਮੁਹੱਬਤ ਦਾ ਕਿਵੇਂ , ਜਿਸ ਤੋਂ ,
ਨਾ ਛੂਹ ਹੀ ਆਤਮਾ ਹੋਈ , ਨਾ ਦਿਲ ਵਿਚ ਦਾਖਲਾ ਹੋਇਆ

ਅਜਬ ਰਿਸ਼ਤਾ ਬਣਾ ਕੇ ਬਹਿ ਗਿਆ ਕਿਸ ਮੋੜ 'ਤੇ ਆਸ਼ਕ,
ਨਾ ਖ਼ੁਦ ਜੋਗਾ ਰਿਹਾ ਬਾਕੀ , ਨਾ ਪੂਰਾ ਯਾਰ ਦਾ ਹੋਇਆ

ਮਨਾਂ ਦਾ ਬੋਝ ਵੀ ਲੱਥਾ , ਗਿਲੇ ਸ਼ਿਕਵੇ ਮਿਟੇ ਸਾਰੇ,
ਉਨ੍ਹਾਂ ਦੇ ਨਾਲ ਸ਼ੀਸ਼ੇ ਵਾਂਗ ਜਦ ਵੀ ਸਾਹਮਣਾ ਹੋਇਆ

ਤੁਰੇ ਮਿਲ ਕੇ ਨਹੀਂ ਜਿਹੜੇ , ਕਦਮ ਇਕ ਵੀ ਅਜੇ ਤਾਈਂ,
ਉਹ ਖ਼ੁਦ ਨੂੰ ਹਮਸਫਰ ਆਖਣ , ਭਲਾ ਕੀ ਮਾਮਲਾ ਹੋਇਆ

ਬਹਾਨੇ ਲਾਉਣ ਦੀ ਆਦਤ ਬਣੀ ਉਸਦੀ ਇਵੇਂ , ਕਿਉਂਕਿ,
ਨਿਭਾਵੇ ਯਾਰੀਆਂ ਵਾਅਦੇ , ਨਾ ਉਸਤੋਂ ਹੌਸਲਾ ਹੋਇਆ

ਸਵੇਰੇ ਦਾ ਘਰੋਂ ਤੁਰਿਆ ਨਾ ਮੁੜਿਆ ਰਾਤ ਵੀ ਰਾਹੀ ,
ਹਨੇਰਾ ਖਾ ਗਿਆ ਉਸਨੂੰ, ਜਦੋਂ ਤੱਕ ਚਾਨਣਾ ਹੋਇਆ

ਕਹੋ ਅਪਨੀ , ਸੁਣੋ ਮੇਰੀ , ਬੁਰਾ ਆਖੋ , ਭਲਾ ਆਖੋ ,
ਜੁਦਾ ਰਹਿ ਕੇ ਨਾ ਝਗੜੇ ਦਾ , ਕਦੇ ਵੀ ਫੈਸਲਾ ਹੋਇਆ

ਲਗਨ ਉਸਦੀ ਤੋਂ ਲੱਗਦਾ ਹੈ ਉਹ ਮੰਜ਼ਿਲ ਤੱਕ ਤੁਰੂ ਡਟ ਕੇ,
ਵਧੇਗਾ ਜੋਸ਼ ਹੀ ਉਸਦਾ , ਕਠਿਨ ਜੇ ਰਾਸਤਾ ਹੋਇਆ

ਤੇਰੇ ਮਗਰੋਂ ਮੈਂ ਕਿਸ ਦੇ ਨਾਲ ਕਰਦਾ ਦਿਲ ਦੀਆਂ ਗੱਲਾਂ ,
ਗ਼ਜ਼ਲ ਨੇ ਬਾਂਹ ਫੜ੍ਹੀ ' ਮਹਿਰਮ ' ਤਾਂ ਫਿਰ ਕੁਝ ਆਸਰਾ ਹੋਇਆ =================================

ਸ਼ਹਿਰ ਦਾ ਹਰ ਸਖ਼ਸ਼ ..........

2009-07-10T06:26:00.000-07:00

ਭਟਕਣਾ ਦਾ ਤੜਫਣਾ ਦਾ ਸਿਲਸਿਲਾ ਕੁਝ ਵੀ ਨਹੀਂ

ਜ਼ਿੰਦਗੀ ਦੀ ਤੋਰ 'ਚੋਂ ਜੇ ਸਮਝਣਾ ਕੁਝ ਵੀ ਨਹੀਂ

ਝੂਠ ਕਹਿੰਦੈ , ਆਖਦਾ ਜੋ , ਇਸ਼ਕ ਹੁੰਦੈ ਸੋਚ ਕੇ ,

ਇਸ਼ਕ ਵਿੱਚ ਹੀ ਤਾਂ ਕੋਈ ਵੀ ਸੋਚਦਾ ਕੁਝ ਵੀ ਨਹੀਂ

ਯਾਰ ਨੇ ਬਣ ਕੇ ਦਿਖਾਇਆ ਗੈਰ ਤੋਂ ਵੱਧ ਓਪਰਾ,

ਉਸ ਜਗ੍ਹਾ ਕੀ ਜ਼ੋਰ ਜਿੱਥੇ ਆਪਣਾ ਕੁਝ ਵੀ ਨਹੀਂ

ਦੂਰ ਜਾ ਕੇ ਉਹ ਬੜਾ ਹੀ ਯਾਦ ਆਇਆ ਹਰ ਸਮੇਂ ,

ਭਰਮ ਸੀ , ਹੋਇਆ ਜੁਦਾ , ਹੋਇਆ ਜੁਦਾ ਕੁਝ ਵੀ ਨਹੀਂ

ਹਰ ਸਮੇਂ ਤੂੰ ਤੜਫਦਾ ਰਹਿਨੈ ਭਲਾ ਕਿਸ ਵਾਸਤੇ ,

ਜੇ ਕਿਸੇ ਦੇ ਨਾਲ ਤੇਰਾ ਵਾਸਤਾ ਕੁਝ ਵੀ ਨਹੀਂ

ਪਿਆਰ ਵਿੱਚ ਨਾਰਾਜ਼ ਹੋ ਕੇ ਮਿਲਦੀ ਹੈ ਖੁਦ ਨੂੰ ਸਜ਼ਾ,

ਪਰ ਗਿਲੇ ਸ਼ਿਕਵੇ ਬਿਨਾਂ ਇਸ ਵਿੱਚ ਮਜ਼ਾ ਕੁਝ ਵੀ ਨਹੀਂ

ਸੌਂ ਗਿਆ ਨਾ ਸਮਝ, ਪਹਿਰੇਦਾਰ , ਉਹ ਹੁਸ਼ਿਆਰ ਹੈ ,

ਹਰ ਤਰਫ ਰੱਖਦੈ ਨਜ਼ਰ , ਬੱਸ ਆਖਦਾ ਕੁਝ ਵੀ ਨਹੀਂ

ਕੀ ਪਤਾ ਪੱਲੜਾ ਝੁਕੇਗਾ ਕਿਸ ਤਰਫ ਇਨਸਾਫ ਦਾ,

ਜਾਣਕੇ ਸਭ ਕੁਝ ਗਵਾਹ ਜੇ ਬੋਲਦਾ ਕੁਝ ਵੀ ਨਹੀਂ

ਸ਼ਹਿਰ ਦਾ ਹਰ ਸਖ਼ਸ਼ ਚਾਹੁੰਦੈ , ਸ਼ਹਿਰ ਵਿੱਚ ਅਪਨੀ ਹਵਾ,

ਸ਼ਹਿਰ ਦੀ ਹੈ ਕੀ ਹਵਾ , ਉਹ ਜਾਣਦਾ ਕੁਝ ਵੀ ਨਹੀਂ

ਮਾਣ ਕਰਕੇ ਅਕਲ ਦਾ ਆਖੇ ਸਹੀ ਨੂੰ ਵੀ ‌ਗ਼ਲਤ ,

ਸੋਚਦੈ ਸਭ ਕੁਝ ਪਤਾ ਹੈ, ਪਰ ਪਤਾ ਕੁਝ ਵੀ ਨਹੀਂ

ਇਸ ਨਗਰ ਚੋਂ ਤੁੰ ਅਜੇ ਇਨਸਾਫ ਦੀ ਨਾ ਭਾਲ ਕਰ ,

ਕੈਦ ਹੈ ਨਿਰਦੋਸ਼ , ਕਾਤਿਲ ਨੂੰ ਸਜ਼ਾ ਕੁਝ ਵੀ ਨਹੀਂ

ਵਕਤ ਆਖੇ ਹਰ ਜਗ੍ਹਾ ਬਦਲਾਵ ਦੀ ਕੁਝ ਲੋੜ ਹੈ ,

ਸਮਝਦੈ ਇਨਸਾਨ ਪਰ ਹੱਲ ਸੋਚਦਾ ਕੁਝ ਵੀ ਨਹੀਂ

=============================

ਸੁਣੋ ਜੇ ਸਚ ਤਾਂ ਕੌੜਾ ਹੈ...................

2009-06-16T10:55:00.000-07:00

ਨਾ ਸਿੱਖੀ ਜਾਚ ਤੈਰਨ ਦੀ , ਉਹ ਫਿਰ ਸਾਗਰ ਕਿਵੇਂ ਤਰਦਾ
ਕਿਸੇ ਨੇ ਡੋਬ ਦਿੱਤਾ ਹੈ , ਇਹ ਦਿਨ ਸ਼ਾਅਦੀ ਨਹੀਂ ਭਰਦਾ

ਗਿਆ ਹੈ ਸਿਰ ਝੁਕਾ ਕੇ ਜੋ , ਉਦਾ ਕੁਝ ਦੋਸ਼ ਤਾਂ ਹੋਊ ,
ਬਿਨਾਂ ਦੋਸ਼ੋਂ ਜੇ ਕੁਝ ਆਖੋ , ਤਾਂ ਗੱਲ ਬੱਚਾ ਵੀ ਨਹੀਂ ਜਰਦਾ

ਅਗਰ ਸਿਰ ਊੱਤੇ ਛੱਤ ਹੁੰਦੀ , ਤੇ ਹੁੰਦੇ ਖਾਣ ਨੂੰ ਦਾਣੇ ,
ਉਹ ਭੁੱਖ ਦੇ ਨਾਲ ਨਾ ਮਰਦਾ, ਤੇ ਨਾ ਹੀ ਠੰਡ ਵਿੱਚ ਠਰਦਾ

ਤੇਰੇ ਤੱਕ ਲੋੜ ਹੋਵੇਗੀ ਖਬਰ ਜੋ ਲੈ ਗਏ ਆ ਕੇ ,
ਕੋਈ ਮਰ ਵੀ ਰਿਹਾ ਹੋਵੇ ਤਾਂ ਬੰਦਾ ਕੰਨ ਨਹੀਂ ਕਰਦਾ

ਉਨਾਂ ਸੰਗ ਦਾਲ ਨਹੀਂ ਗਲਦੀ , ਤੇ ਨਾ ਕੋਈ ਫ਼ਰਕ ਹੀ ਪੈਂਦੈ,
ਮਗਰ ਰਿਸ਼ਤਾ ਹੀ ਐਸਾ ਹੈ ਕਿ ਬੋਲੇ ਬਿਨ ਵੀ ਨਹੀਂ ਸਰਦਾ

ਉਹ ਗੇੜੇ ਮਾਰ ਬੈਠਾ ਏ, ਚੜ੍ਹਵਾ ਚਾੜ੍ਹ ਬੈਠਾ ਏ,
ਕਰੇ ਦਸਖਤ, ਨਹੀਂ ਬਣਦਾ, ਅਜੇ ਵੀ ਮੂਡ ਅਫਸਰ ਦਾ

ਫਰੋਲੇ ਗੁਪਤ ਖਾਨੇ ਹੀ , ਕੋਈ ਵੀ ਚੀਜ਼ ਨਹੀਂ ਛੇੜੀ ,
ਉਨਾਂ ਦੇ ਨਾਲ ਬੰਦਾ ਰਲ ਗਿਆ ਹੋਣੈ ਮੇਰੇ ਘਰ ਦਾ

ਤੂੰ ਜਿੱਤ ਕੇ ਕੇਸ ਕਿਉਂ ਹਰਿਆ ਨੇ ਗੱਲਾਂ ਕਰ ਰਹੇ ਲੋਕੀ ,
ਗਵਾਹ ਜੇ ਨਾ ਵਿਕੇ ਹੁੰਦੇ ਕਦੇ ਨਾ ਇਸ ਤਰਾਂ ਹਰਦਾ

ਸੁਣੋ ਜੇ ਸਚ ਤਾਂ ਕੌੜਾ ਹੈ , ਕਹੋ ਜੇ ਸਚ ਤਾਂ ਫਾਂਸੀ ਹੈ ,
ਇਸੇ ਲਈ ਸੱਚ 'ਤੇ ਹਰ ਥਾਂ 'ਤੇ ਹੈ ' ਮਹਿਰਮ ' ਪੈ ਰਿਹਾ ਪਰਦਾ =========================================

ਤੁਰੋ ਬਣ ਕਾਫ਼ਿਲਾ .............. .........

2009-05-30T23:00:00.000-07:00

ਬੜੀ ਸੀ ਤਾਂਘ ਮਿਲਨੇ ਦੀ , ਸੀ ਮਿਲਿਆਂ ਹੋ ਗਈ ਮੁੱਦਤ
ਉਹਦੇ ਘਰ ਦੇਖ ਕੇ ਜਿੰਦਰਾ , ਨਾ ਪੂਰੀ ਹੋ ਸਕੀ ਹਸਰਤ

ਉਨ੍ਹਾਂ ਦਾ ਵੱਡਿਆਂ ਲੋਕਾਂ ਦੇ ਵਿੱਚ ਹੈ ਉੱਠਣਾ ਬਹਿਣਾ,
ਦੋ ਘੜੀਆਂ ਘਰ 'ਚ ਬੈਠਣ ਦੀ, ਤਦੇ ਨਹੀਂ ਮਿਲ ਰਹੀ ਫ਼ੁਰਸਤ

ਉਹ ਮਿੱਠਾ ਬੋਲ ਵੀ ਬੋਲੇ , ਬੜੀ ਨਰਮੀ ਵੀ ਰੱਖਦਾ ਹੈ ,
ਉਹ ਸਭ ਦੀ ਜੇਬ ਟੋਂਹਦਾ ਏ , ਹੈ ਕੈਸੀ ਓਸਦੀ ਫ਼ਿਤਰਤ

ਜਿਨ੍ਹਾਂ ਨੇ ਘਰ ਉਜਾੜੇ ਨੇ, ਉਨ੍ਹਾਂ ਨੂੰ ਪਾਉਂਦੈ ਉਹ ਜੱਫੀਆਂ ,
ਜਿਨ੍ਹਾਂ ਨੇ ਘਰ ਉਸਾਰੇ ਨੇ , ਉਨ੍ਹਾਂ ਨੂੰ ਕਰਦਾ ਏ ਨਫ਼ਰਤ

ਘਰੋ ਘਰ ਫਿਰ ਲਿਆ ਉਸਨੇ , ਜਦੋਂ ਸੀ ਲੈਣੀਆਂ ਵੋਟਾਂ ,
ਉਹ ਦਰ ਦਰ ਫੇਰਦਾ ਏ ਹੁਣ , ਜੀ ੍ ਇਹ ਹੈ ਵੋਟ ਦੀ ਕੀਮਤ

ਜਿਨ੍ਹਾਂ 'ਤੇ ਕੇਸ ਚੱਲਦੇ ਸੀ, ਗਬਨ ਦੇ ਜਾਂ ਘੁਟਾਲੇ ਦੇ ,
ਦੁਬਾਰਾ ਚੁਣ ਕੇ ਲੋਕਾਂ ਨੇ , ਵਧਾਈ ਉਹਨਾਂ ਦੀ ਸ਼ੁਹਰਤ

ਘਰੇ ਨਾਂ ਲੈ ਲਵੋ ਰੱਬ ਦਾ , ਕੀ ਲੈਣਾ ਮੰਦਰੀਂ ਜਾ ਕੇ ,
ਬਣੇ ਨੇ ਕਤਲਗਾਹ ਡੇਰੇ , ਹੈ ਲੁੱਟੀ ਜਾ ਰਹੀ ਇੱਜਤ

ਅਹਾਤੇ ਵਿੱਚ ਜੋ ਕਲ੍ਹ ਬੈਠਾ ਸੀ ਬੰਦਾ ਘੇਰ ਕੇ 'ਸਾਮੀ ,
ਕਹੇ ਅੱਜ ਮੋਰਚਾ ਲਾਈਏ ਬੜਾ ਹੀ ਕੋੜ੍ਹ ਹੈ ਰਿਸ਼ਵਤ

ਜੋ ਮਹਿਲਾਂ ਵਿੱਚ ਨੇ ਬੈਠੇ , ਨਈਂ ਲਾਉਂਦੇ ਪੈਰ ਧਰਤੀ 'ਤੇ,
ਉਨ੍ਹਾਂ ਤੋਂ ਆਸ ਕਿਉਂ ਰੱਖਦੈਂ , ਕਰਨਗੇ ਦੂਰ ਉਹ ਗ਼ੁਰਬਤ

ਤੁਰੋ ਬਣ ਕਾਫ਼ਿਲਾ ' ਮਹਿਰਮ ' ਅਸੀਂ ਹੱਕ ਵਾਸਤੇ ਲੜਨੈ ,
ਅਸੀਂ ਕੋਈ ਡਾਂਗ ਨਹੀਂ ਫੜ੍ਹਨੀ , ਆਸਾਡੀ ਕਲਮ ਹੈ ਤਾਕਤ
==========================================

ਹਰ ਇਕ ਬੰਦਾ ਸੁਪਨਾ ਸਿਰਜੇ

2009-05-14T21:37:00.000-07:00

ਗ਼ਜ਼ਲ -----------------
ਹਰ ਇਕ ਬੰਦਾ ਸੁਪਨਾ ਸਿਰਜੇ ਉਸਨੇ ਕਿਵੇਂ ਬਨਾਉਣਾ ਘਰ ਨੂੰ
ਲੇਕਿਨ ਸਭ ਦੀ ਕਿਸਮਤ ਵਿਚ ਤਾਂ ਹੁੰਦਾ ਨਹੀਂ ਵਸਾਉਣਾ ਘਰ ਨੂੰ

ਪੈਸੇ ਵਾਲਾ ਜਦ ਵੀ, ਜਿੱਥੇ ਚਾਹੇ ਮਹਿਲ ਬਣਾ ਸਕਦਾ ਹੈ ,
ਮਾਤੜ ਲਈ ਤਾਂ ਇਕ ਵਾਰੀ ਵੀ ਔਖਾ ਬਹੁਤ ਬਨਾਉਣਾ ਘਰ ਨੂੰ

ਚਹੁੰ ਕੰਧਾਂ 'ਤੇ ਛੱਤ ਪਾ ਦਈਏ , ਤਾਂ ਉਸਨੂੰ ਵੀ ਘਰ ਨਹੀਂ ਕਹਿੰਦੇ,
ਦੋ ਜੀਅ , ਬੱਚੇ ਦੀ ਕਿਲਕਾਰੀ ਰੱਖਦੇ ਸਦਾ ਲੁਭਾਉਣਾ ਘਰ ਨੂੰ

ਬਾਪੂ ਦੇ ਮੰਜੇ ਦੇ ਹਿੱਸੇ , ਖ਼ਵਰੇ ਕਿਸ ਖੂੰਜੇ ਨੇ ਆਉਣਾ ,
ਜੁਦਾ ਰਹਿਣ ਲਈ ਪੁੱਤਰਾਂ ਨੇ ਜਦ ਉਸ ਕੋਲੋਂ ਵੰਡਵਾਉਣਾ ਘਰ ਨੂੰ

ਉਸਨੇ ਤਾਂ ਮਜ਼ਬੂਰੀ ਵਸ ਹੀ , ਚੁਣਿਆ ਹੈ ਬਣਵਾਸ ਭੁਗਤਣਾ ,
ਸੁਪਨੇ ਵਿਚ ਵੀ ਮੁਸ਼ਕਿਲ ਲੱਗਦੈ , ਉਸਦਾ ਕਦੇ ਭੁਲਾਉਣਾ ਘਰ ਨੂੰ

ਕਦੇ ਕਦੇ ਬੇਕਦਰੀ ਸਹਿ ਕੇ , ਵੀ ਮੋਹ ਉਸਦਾ ਛੱਡ ਨਹੀਂ ਹੁੰਦਾ ,
ਚੰਗੇ ਦਿਨਾਂ ਦੀ ਆਸ 'ਚ ਮੁੜ ਮੁੜ ਪੈਂਦਾ , ਵਾਪਿਸ ਆਉਣਾ ਘਰ ਨੂੰ

ਮਰਦ ਕਮਾਈ ਕਰ ਕੇ ਬੇਸ਼ੱਕ ਭਰ ਦੇਵੇ ਘਰ ਸਾਰਾ , ਲੇਕਿਨ ,
ਸੁਘੜ ਸਿਆਣੀ ਔਰਤ ਜਾਣੇ , ਲਿਸ਼ਕਾਉਣਾ ਚਮਕਾਉਣਾ ਘਰ ਨੂੰ

ਇਕ ਦੀ ਲਾਪਰਵਾਹੀ , ਦੂਜੇ ਦੀ ਮਨਮਰਜ਼ੀ ਚੱਲਦੀ ਜਿੱਥੇ ,
ਰੱਬ ਹੀ ਜਾਣੇ ਉਸ ਹਾਲਤ ਵਿਚ , ਟੁੱਟਣੋਂ ਕਿਵੇਂ ਬਚਾਉਣਾ ਘਰ ਨੂੰ

ਇਕ ਦੋ ਵਾਰੀ ਪੱਕਾ ਦਿਨ ਵਿਚ , ' ਛਡਜੂੰ ਛਡਜੂੰ ' ਕਹਿੰਦਾ ਮਾਹੀ ,
ਨਾ ਜਾਣੇ ਕਿਉਂ ਸੌਖਾ ਸਮਝੇ , ਢਾਹ ਕੇ ਫੇਰ ਬਨਾਉਣਾ ਘਰ ਨੂੰ

ਤੁਰ ਪੈਂਦਾ ਉਹ ਕਹਿ ਕੇ ਅੱਜ ਨਹੀਂ ਮੁੜਨਾ , ਲੇਕਿਨ ਆ ਜਾਂਦਾ ਹੈ ,
ਇੰਝ ਹੀ ਚੱਲਦਾ ਰਹਿੰਦਾ ਉਸਦਾ ਘਰ ਤੋਂ ਜਾਣਾ , ਆਉਣਾ ਘਰ ਨੂੰ

ਮੇਰੇ ਸਿਰ 'ਤੇ ਛੱਤ ਜੋ ਦਿਸਦੀ, ਕਰਜ਼ੇ ਹੇਠ ਦਬੀ ਹੈ ਹਾਲੇ ,
ਸਾਲਾਂ ਬੱਧੀ ਕਿਸ਼ਤਾਂ ਦੇ ਦੇ , ਪੈਣਾਂ ਅਜੇ ਛੁਡਾਉਣਾ ਘਰ ਨੂੰ

ਕੁੱਲੀ ਵਿਚ ਸੁਰਗਾਂ ਦੇ ਝੂਟੇ , ਮਿਲ ਜਾਣੇ ਜੇ ਨਾਲ ਰਹੇ ਉਹ ,
ਖ਼ਵਰੇ ਮੇਰੇ ' ਮਹਿਰਮ ' ਨੇ ਹੁਣ , ਕਿਸ ਦਿਨ ਫੇਰਾ ਪਾਉਣਾ ਘਰ ਨੂੰ ======================================

.........ਅੱਖੀਆਂ ----------

2009-05-05T20:43:00.000-07:00

ਗ਼ਜ਼ਲ
ਜਦ ਵੀ ਯਾਰ ਮਿਲਾਈਆਂ ਅੱਖੀਆਂ ,
ਹੱਸੀਆਂ ਤੇ ਮੁਸਕਾਈਆਂ ਅੱਖੀਆਂ

ਚਾਹਤ ਚਾਹਤ ਦੇ ਗਲ਼ ਲੱਗੀ ,
ਦਿੰਦੀਆਂ ਫਿਰਨ ਵਧਾਈਆਂ ਅੱਖੀਆਂ

ਅੱਖੀਆਂ ਅੱਖੀਆਂ ਕਰਦੀਆਂ ਗੱਲਾਂ ,
ਅੱਖੀਆਂ ਤੋਂ ਸ਼ਰਮਾਈਆਂ ਅੱਖੀਆਂ

ਦਿਲ ਨੂੰ ਹੱਥੋਂ ਅਸੀਂ ਗੁਆਇਆ ,
ਜਦ ਵੀ ਹਨ ਟਕਰਾਈਆਂ ਅੱਖੀਆਂ

ਉਹਨਾਂ ਨਾਲ ਮਿਲਾਈਆਂ ਜਦ ਵੀ ,
ਉਲਟਾ ਉਨਾਂ ਦਿਖਾਈਆਂ ਅੱਖੀਆਂ

ਕੱਲ ਤੱਕ ਅੱਖੀਆਂ ਮਟਕਾਉਂਦਾ ਸੀ,
ਹੁਣ ਕਿਉਂ ਯਾਰ ਚੁਰਾਈਆਂ ਅੱਖੀਆਂ

ਲੱਗੀ ਸੱਟ ਕਲੇਜੇ ਡਾਹਡੀ ,
ਰੋਈਆਂ ਤੇ ਕੁਰਲਾਈਆਂ ਅੱਖੀਆਂ ]

ਹੁਣ ਤਾਂ ਕੋਈ ਗੱਲ ਨਾ ਅਹੁੜੇ ,
ਤਾਂ ਹੀ ਨੀਵੀਆਂ ਪਾਈਆਂ ਅੱਖੀਆਂ

ਦੱਸ ਕੀ ਦੱਸਾਂ ਦੁਨੀਆਂ ਨੂੰ ਮੈਂ ,
ਰੋ ਰੋ ਕਿਵੇਂ ਸੁਜਾਈਆਂ ਅੱਖੀਆਂ

ਕੌਣ ਇਨਾਂ ਦਾ ਦਰਦ ਵੰਡਾਵੇ ,
ਸੱਜਣਾ ਪਾਉਣ ਦੁਹਾਈਆਂ ਅੱਖੀਆਂ

ਦਿਲ ਨੂੰ ਤਾਂ ਸਮਝਾ ਲੈਨਾਂ , ਪਰ ,
ਜਾਂਦੀਆਂ ਨਾ ਸਮਝਾਈਆਂ ਅੱਖੀਆਂ

ਦਰਦ ਕਹਾਣੀ ਸੁਣ ਕੇ ਮੇਰੀ ,
ਤੇਰੀਆਂ ਕਿਉਂ ਭਰ ਆਈਆਂ ਅੱਖੀਆਂ

ਆ ਕੇ ਆਪ ਵਰਾ ਲਊ, ਹੁਣ ਨਾ,
ਮੈਥੋਂ ਜਾਣ ਵਰਾਈਆਂ ਅੱਖੀਆਂ

ਯਾਰ - ਉਦੇ ਦੀਦਾਰ ਬਿਨਾਂ ਨੇ,
ਪਥਰਾਈਆਂ ਪਥਰਾਈਆਂ ਅੱਖੀਆਂ

ਖ਼ਵਰੇ ਕਿਉਂ ਘੁੰਘਟ ਦੇ ਓਹਲੇ ,
' ਮਹਿਰਮ ' ਉਨਾਂ ਛੁਪਾਈਆਂ ਅੱਖੀਆਂ
========================

ਗ਼ਜ਼ਲ - ... ..... ਸਭ ਗੇੜ ਹੈ ਸਮੇਂ ਦਾ |

2009-04-24T00:09:00.000-07:00

ਜਿਗਰਾ ਉਦਾ ਹੈ ਤਕੜਾ , ਯਾਰਾਂ 'ਚ ਜੋ ਖਲੋ ਕੇ

ਹੱਸਦਾ ਹੈ , ਸੀ ਨਾ ਕਰਦਾ, ਸੀਨੇ 'ਚ ਗ਼ਮ ਲੁਕੋ ਕੇ

ਮਹਿਬੂਬ ਨੂੰ ਹਮੇਸ਼ਾ , ਤਰਲਾ ਕਰੇ ਮੁਹੱਬਤ ,

ਜਾਵੀਂ ਨਾ ਦੂਰ ਮੈਥੋਂ , ਏਨਾ ਕਰੀਬ ਹੋ ਕੇ

ਪੈਸੇ ਦੀ ਦੌੜ ਪਿੱਛੇ , ਮਸਰੂਫ਼ ਹੈ ਉਹ ਏਨਾ ,

ਦੱਸੇ ਨਾ ਹਾਲ ਪੁੱਛੇ , ਦੋ ਚਾਰ ਪਲ ਖਲੋ ਕੇ

ਫਿਰਦਾ ਤਲਾਸ਼ ਕਰਦਾ , ਹੁਣ ਫਿਰ ਉਹ ਰਿਸ਼ਤਿਆਂ ਦੀ ,

ਮਾਯੂਸ ਹੈ ਜੋ ਹਰ ਇਕ , ਰਿਸ਼ਤੇ ਦਾ ਬੋਝ ਢੋ ਕੇ

ਜਿਸ ਤੇ ਯਕੀਨ ਕਰਕੇ , ਦੱਸੇ ਮੈਂ ਰਾਜ਼ ਦਿਲ ਦੇ ,

ਪਰਦਾ ਉਠਾ ਰਿਹਾ ਉਹ , ਮਹਿਫ਼ਲ ਦੇ ਵਿਚ ਖਲੋ ਕੇ

ਇਹਸਾਸ ਹੈ ਜਿਨਾਂ ਨੂੰ , ਜ਼ਖ਼ਮਾਂ ਦੀ ਪੀੜ ਦਾ ਕੁਝ ,

ਦਿੰਦੇ ਸਜ਼ਾ ਉਹੀ ਨੇ, ਨਸ਼ਤਰ ਚੁਬੋ ਚੁਬੋ ਕੇ

ਏਡੇ ਜਹਾਨ ਵਿਚ ਤੂੰ , ਫਿਰਦਾ ਏਂ ਕਿਉਂ ਇਕੱਲਾ ,

ਅਪਣਾ ਬਣਾ ਕਿਸੇ ਨੂੰ , ਬਹਿ ਜਾ ਕਿਸੇ ਦਾ ਹੋ ਕੇ

ਦੁਖ , ਦਰਦ , ਜ਼ਖ਼ਮ , ਹਾਸੇ , ਕੀ ਮੇਲ ਕੀ ਵਿਛੋੜਾ ,

ਦਿੰਦੀ ਹੈ ਜ਼ਿੰਦਗਾਨੀ , ਫੁੱਲਾਂ ਤਰਾਂ ਪਰੋ ਕੇ

ਹੱਥ ਪੈਰ ਮਾਰ ਮੈਨੂੰ , ਤਰਨਾ ਤਾਂ ਆ ਗਿਆ ਹੈ ,

ਉਪਕਾਰ ਕਰ ਗਏ ਉਹ , ਕਿਸ਼ਤੀ ਮੇਰੀ ਡੁਬੋ ਕੇ

ਮਨਹੂਸ ਆਖ ਉਸਨੂੰ , ਪਾ ਤੇਲ ਸਾੜ ਦਿੱਤੈ ,

ਦਹਿਲੀਜ਼ ਤੋਂ ਲੰਘਾਇਆ , ਜਿਸ ਨੂੰ ਸੀ ਤੇਲ ਚੋ ਕੇ

ਇਤਰਾਜ਼ ਕਰ ਨਾ ' ਮਹਿਰਮ ' , ਸਭ ਗੇੜ ਹੈ ਸਮੇਂ ਦਾ ,

ਦਿੰਦਾ ਦਗ਼ਾ ਹੈ ਉਹ ਵੀ , ਮਿਲਦਾ ਗਲ਼ੇ ਜੋ ਰੋ ਕੇ

==================================

ਜਦ ਮੀਤ ਪਿਆਰੇ ਦੀ .......

2009-04-06T06:55:00.000-07:00

ਗ਼ਜ਼ਲ
ਜਦ ਮੀਤ ਪਿਆਰੇ ਦੀ , ਤਸਵੀਰ ਵਸੇ ਦਿਲ ਵਿਚ
ਫਿਰ ਇਸ਼ਕ ਮੁਹੱਬਤ ਦਾ, ਇਕ ਦੀਪ ਜਗੇ ਦਿਲ ਵਿਚ

ਜੇ ਸਾਥ ਉਦਾ ਚਾਹੁਨੌ , ਵਿਸ਼ਵਾਸ ਬਣਾ ਏਨਾ,
ਉਹ ਤੋੜ ਲਵੇ ਯਾਰੀ , ਨਾ ਸੋਚ ਸਕੇ ਦਿਲ ਵਿਚ

ਇਹ ਵਕਤ ਜਦੋਂ ਬਦਲੇ , ਇਤਫ਼ਾਕ ਬਣੇ ਐਸਾ ,
ਅਣਜਾਣ ਮੁਸਾਫ਼ਿਰ ਵੀ , ਮਹਿਮਾਨ ਬਣੇ ਦਿਲ ਵਿਚ

ਐ ਯਾਰ ਨਸੀਬਾਂ ਬਿਨ , ਇਹ ਰਹਿਣ ਅਧੂਰੇ ਹੀ,
ਇਨਸਾਨ ਸਜਾ ਲੌਂਦੌ , ਅਰਮਾਨ ਬੜੇ ਦਿਲ ਵਿਚ

ਅਣਮੋਲ ਘੜੀ ਓਦੋਂ , ਬੇਕਾਰ ਜਿਹੀ ਜਾਪੇ,
ਜਦ ਗਰਜ਼ ਬਣੇ ਭਾਰੂ , ਜ਼ਜਬਾਤ ਮਰੇ ਦਿਲ ਵਿਚ

ਮਾਯੂਸ ਨਹੀਂ ਹੁੰਦਾ , ਜੇ ਯਾਰ ਨਹੀਂ ਦਿਸਦਾ ,
ਉਹ ਸੀਸ ਝੁਕਾ ਕੇ ਹੀ , ਦੀਦਾਰ ਕਰੇ ਦਿਲ ਵਿਚ

ਬੇਦਰਦ ਜ਼ਮਾਨਾ ਤਾਂ , ਦੀਵਾਰ ਬਣੇ ਅਕਸਰ ,
ਮਿਲ ਪੌਣ ਦਿਲਾਂ ਵਾਲੇ , ਜੇ ਸਿਦਕ ਰਹੇ ਦਿਲ ਵਿਚ

ਹਮਦਰਦ ਤਾਂ ਭੁੱਲ ਕੇ ਵੀ , ਨਾ ਸਿਫ਼ਤ ਕਰੇ ਝੂਠੀ ,
ਉਹ ਨੇਕ ਸਲਾਹ ਦੇ ਕੇ , ਵਿਸ਼ਵਾਸ ਭਰੇ ਦਿਲ ਵਿਚ

ਐ ਯਾਰ ਨਹੀਂ ਕਰਦਾ, ਇਹ ਇਸ਼ਕ ਵਫ਼ਾ ਸਭ ਨੂੰ ,
ਅਕਸਰ ਹੀ ਵਿਛੋੜੇ ਦਾ , ਦਿਲ ਦਰਦ ਜਰੇ ਦਿਲ ਵਿਚ

ਗੁਸਤਾਖ਼ ਬੜਾ ' ਮਹਿਰਮ ' , ਕੁਝ ਮਾਫ਼ ਨਹੀਂ ਕਰਦਾ ,
ਉਹ ਆਖ ਦਏ ਜੋ ਵੀ , ਮਹਿਸੂਸ ਕਰੇ ਦਿਲ ਵਿਚ
----------------------------------------------

.... ... ਭੁੱਲ ਜਾਣ ਦੀ ਕੋਸ਼ਿਸ਼ ਕਰੀਂ |

2009-03-20T01:42:00.000-07:00

ਅਪਨਾ ਗਿਲਾ, ਉਸਦੀ ਖਤਾ , ਭੁੱਲ ਜਾਣ ਦੀ ਕੋਸ਼ਿਸ਼ ਕਰੀਂ
ਖ਼ੁਦ ਨੂੰ ਦਿਲਾ, ਕੁਝ ਇਸ ਤਰਾਂ, ਸਮਝਾਣ ਦੀ ਕੋਸ਼ਿਸ਼ ਕਰੀਂ

ਉਸਦੀ ਵਫ਼ਾ ਨੂੰ ਹੋਰ ਨਾ, ਅਜ਼ਮਾਣ ਦੀ ਕੋਸ਼ਿਸ਼ ਕਰੀਂ
ਰੋਸੇ ਮਿਟਾ ਕੇ ਯਾਰ ਨੂੰ , ਗਲ਼ ਲਾਣ ਦੀ ਕੋਸ਼ਿਸ਼ ਕਰੀਂ

ਪੱਕਾ ਠਿਕਾਣਾ ਵੀ ਬਣਾ, ਬੇਸ਼ੱਕ ਬਿਗਾਨੇ ਦੇਸ਼ ਵਿੱਚ,
ਫਿਰ ਵੀ ਕਦੇ, ਇਸ ਦੇਸ਼ ਵਿੱਚ, ਮੁੜ ਆਣ ਦੀ ਕੋਸ਼ਿਸ਼ ਕਰੀਂ

ਅਪਨੇ ਗ਼ਮਾਂ ਨੂੰ , ਸੋਗ ਨੂੰ , ਦਿਲ ਵਿੱਚ ਛੁਪਾ ਕੇ ਵੀ ਕਦੇ,
ਸਭ ਦੀ ਖੁਸ਼ੀ ਦੇ ਵਾਸਤੇ , ਮੁਸਕਾਣ ਦੀ ਕੋਸ਼ਿਸ਼ ਕਰੀਂ

ਦੇਖੀਂ ਕਿਤੇ ਨਾ ਦੂਰ ਹੀ, ਰੁੱਸ ਕੇ ਚਲੇ ਜਾਵੀਂ ਘਰੋਂ ,
ਸਭ ਕੁਝ ਭੁਲਾ ਕੇ ਸ਼ਾਮ ਤੱਕ, ਘਰ ਆਣ ਦੀ ਕੋਸ਼ਿਸ਼ ਕਰੀਂ

ਔਵੇਂ ਸਹਾਰੇ ਵਾਸਤੇ , ਤਿਨਕੇ ਰਹੀਂ ਨਾ ਭਾਲਦਾ ,
ਹਿੰਮਤ ਕਰੀਂ, ਪਰਲੇ ਕਿਨਾਰੇ ਜਾਣ ਦੀ ਕੋਸ਼ਿਸ਼ ਕਰੀਂ

ਬੱਚਾ ਜਦੋਂ ਵੀ ਆਪਣਾ , ਭੁੱਲ ਕੇ ਕੁਰਾਹੇ ਜਾ ਪਵੇ,
ਲਾਗੇ ਬਿਠਾ ਕੇ ਓਸਨੂੰ , ਸਮਝਾਣ ਦੀ ਕੋਸ਼ਿਸ਼ ਕਰੀਂ

ਜਿਗਰਾ ਕਰੀਂ, ਮਿਹਨਤ ਕਰੀਂ , ਚੰਗੇ ਦਿਨਾਂ ਦੀ ਆਸ ਵਿੱਚ,
ਮਾੜੇ ਦਿਨਾਂ ਦੀ ਯਾਦ ਨੂੰ , ਭੁੱਲ ਜਾਣ ਦੀ ਕੋਸ਼ਿਸ਼ ਕਰੀਂ

ਲਾਉਂਦਾ ਰਿਹੈ ਤੇ ਲਾਏਗਾ , ਤੈਨੂੰ ਜ਼ਮਾਨਾ ਫੱਟ ਬੜੇ ,
ਪਰ ਤੂੰ ਕਿਸੇ ਦੇ ਜ਼ਖ਼ਮ ਨੂੰ , ਸਹਿਲਾਣ ਦੀ ਕੋਸ਼ਿਸ਼ ਕਰੀਂ

ਬੰਦਾ ਜਦੋਂ ਵੀ ਮਾਰਿਆ , ਹੰਕਾਰ ਨੇ ਹੀ ਮਾਰਿਆ,
ਅਪਨੀ ਖ਼ੁਦੀ ਦੇ ਨਾਲ ਤੂੰ , ਟਕਰਾਣ ਦੀ ਕੋਸ਼ਿਸ਼ ਕਰੀਂ

ਵਾਦਾ ਕਰੀਂ ਨਾ ਤੂੰ ਕਦੇ , ਟੁੱਟੇ ਤਾਂ ਲਗਦਾ ਹੈ ਬੁਰਾ,
ਤੇਰਾ ਜਦੋਂ ਵੀ ਦਿਲ ਕਰੇ , ਬਸ ਆਣ ਦੀ ਕੋਸ਼ਿਸ਼ ਕਰੀਂ

ਵੈਸੇ ਕਿਸੇ ਦੇ ਨਾਲ ਵੀ , ਹੋਵੇ ਬੁਰਾ ਨਾ ' ਮਹਿਰਮਾ ' ,
ਹੋਵੇ ਅਗਰ ਤੈਥੋਂ ਬੁਰਾ , ਪਛਤਾਣ ਦੀ ਕੋਸ਼ਿਸ਼ ਕਰੀਂ
===============================

ਦਿਲ ਅਪਨੀ ਮਰਜ਼ੀ ਦਾ ਮਾਲਿਕ ......

2009-03-04T09:07:00.000-08:00

ਬਣਦੀ ਸਦਾ ਜ਼ੁਬਾਨ ਜ਼ਰੀਆ, ਦੁਖ-ਸੁਖ ਪੁੱਛਣ ਦੱਸਣ ਦਾ

ਫੇਰ ਭਲਾ ਕੀ ਕੰਮ ਹੈ ਕੁਝ ਵੀ, ਦਿਲ ਵਿਚ ਦਬ ਕੇ ਰੱਖਣ ਦਾ

ਦਿਲ ਅਪਨੀ ਮਰਜ਼ੀ ਦਾ ਮਾਲਿਕ , ਇਹ ਕਦ ਵਸ ਵਿਚ ਰਹਿੰਦਾ ਹੈ,

ਬੰਦਾ ਜ਼ੋਰ ਬਥੇਰਾ ਲਾਉਂਦੈ , ਇਸ ਨੂੰ ਰੋਕਣ ਟੋਕਣ ਦਾ

ਜਿਸ ਨੂੰ ਮਿਲਨਾ ਚਾਹੁੰਨੈ , ਦਿਲ ਚੋਂ , ਸਾਰੇ ਰੋਸ ਭੁਲਾ ਕੇ ਮਿਲ,

ਸਿੱਧੇ ਮੂੰਹ ਜੇ ਗੱਲ ਨਹੀਂ ਕਰਨੀ , ਕੀ ਫਾਇਦਾ ਗਲ਼ ਲੱਗਣ ਦਾ

ਦਿਲ ਨੇ ਜਿਸ ਤੇ ਆਉਣਾ ਹੋਇਆ , ਆ ਜਾਣਾ ਬਿਨ ਪੁੱਛਿਆਂ ਹੀ,

ਇਸ ਨੇ ਤੈਨੂੰ ਵਕਤ ਕਦੇ ਨਾ , ਦੇਣਾ ਸੋਚਣ ਪਰਖਣ ਦਾ

ਦੁਨੀਆਂ ਚੇਤੇ ਰੱਖਦੀ ਕੇਵਲ, ਚੰਗੇ ਮੰਦੇ ਕਂਮਾਂ ਨੂੰ ,

ਜਿਸ ਨੇ ਆਖਿਰ ਮਿੱਟੀ ਹੋਣੈ , ਨਾ ਕਰ ਮਾਣ ਸੁਹੱਪਣ ਦਾ

ਦਿਲ ਦਾ ਭੇਤ ਜੋ ਦਿੰਦੈ ਸਭ ਨੂੰ , ਅਪਨਾ ਚੈਨ ਗਵਾਉਂਦਾ ਹੈ,

ਹਰ ਪਲ ਹੀ ਡਰ ਬਣਿਆ ਰਹਿੰਦਾ, ਉਸ ਨੂੰ ਪਰਦਾ ਉੱਠਣ ਦਾ

ਮੈਂ ਉਸ ਨੁੰ ਅਪਨਾ ਰੱਬ ਸਮਝਾਂ , ਸਮਝੇ ਹੋਰ ਕਿਸੇ ਨੂੰ ਓਹ,

' ਨੇਰੇ ਵਿੱਚੋਂ ਭਾਲ ਰਹੇ ਹਾਂ , ਦੋਵੇਂ ਟੁਕੜਾ ਚਾਨਣ ਦਾ

ਜਾਣਾ ਜਾਣਾ ਨਾ ਕਰ ਐਵੇਂ , ਬਹਿ ਜਾ ਹਾਲੇ ਹੋਰ ਘੜੀ ,

ਵੈਸੇ ਦਿਲ ਨੇ ਫਿਰ ਵੀ ਮਿੱਤਰਾ , ਨਾ ਨਹੀਂ ਲੈਣਾ ਰੱਜਣ ਦਾ

ਰੁਸਣਾ, ਮੰਨਣਾ, ਮੇਲ, ਵਿਛੋੜਾ, ਚਲਦਾ ਰਹਿਣਾ ਜੀਵਨ ਵਿਚ,

ਗ਼ਮੀਆਂ ਵੇਲੇ ਰੋਣ ਦਾ ਚੱਕਰ , ਖ਼ੁਸ਼ੀਆਂ ਵੇਲੇ ਹੱਸਣ ਦਾ

ਰੱਬ ਹੀ ਜਾਣੇ ਕਿੰਜ ਉਹ ਡੁੱਬਾ, ਆ ਕੇ ਕੋਲ ਕਿਨਾਰੇ ਦੇ,

ਖ਼ੁਦ ਨੂੰ ਜਿਹੜਾ ਸਮਝ ਰਿਹਾ ਸੀ, ਤਾਰੂ ਹਰ ਇਕ ਪੱਤਣ ਦਾ

ਦੇਖੋ ਹੁਣ ਕੀ ਬਣਦੈ ਉਸਦਾ , ਨਾਲ ਉਨਾਂ ਦੇ ਰਲਿਆ ਜੋ,

ਸ਼ੌਕ ਜਿਨਾਂ ਦਾ ਚਾੜ ਕੇ ਕੋਠੇ , ਮਗਰੋਂ ਪੌੜੀ ਚੱਕਣ ਦਾ

ਸਿੱਧੇ ਸਾਦੇ ਲਫ਼ਜ਼ਾਂ ਵਿਚ ਮੈਂ , ਅਪਨੇ ਸ਼ਿਅਰ ਸੁਣਾਉਂਦਾ ਹਾਂ ,

ਤੇਰੇ ਮਨ ਤੇ ਬੋਝ ਪਵੇ ਨਾ , ਅਰਥ ਇਨਾਂ ਦੇ ਸਮਝਣ ਦਾ

ਹੁਣ ਤਕ ਮੈਂ ਤਾਂ ਉਮਰ ਗੁਜ਼ਾਰੀ , ਦਿਲ ਦਾ ਮਹਿਰਮ ਭਾਲਦਿਆਂ,

ਖਵਰੇ ਕਿਸ ਦਿਨ ਮੁਕਣੈ ਚੱਕਰ , ਮੇਰੇ ਭਟਕਣ, ਤੜਪਣ ਦਾ

ਇਸ਼ਕ ਬੜਾ ਤੜਪਾਉਂਦੈ, ਹੋਸ਼ ਭੁਲਾਉਂਦੈ , ਜਾਨ ਸੁਕਾਉਂਦਾ ਹੈ ,

ਫਿਰ ਵੀ ਜਜ਼ਬਾ ਰੱਖਦੈ ' ਮਹਿਰਮ ' , ਏਡਾ ਚੁੱਕਣ ਚੱਕਣ ਦਾ

-----------------------------------------------------

ਇਸ਼ਕ ਜਦੋਂ ਵੀ ਹੋ ਜਾਂਦਾ ਹੈ ......

2009-02-22T07:32:00.000-08:00

ਇਸ਼ਕ ਜਦੋਂ ਵੀ ਹੋ ਜਾਂਦਾ ਹੈ, ਏਦਾਂ ਹੋਸ਼ ਭੁਲਾ ਦਿੰਦਾ ਹੈ
ਜਿਉਂ ਪਰਵਾਨਾ ਸ਼ਮਾਂ ਤੇ ' ਮਰ ਕੇ ' ਅਪਨਾ ਆਪ ਲੁਟਾ ਦਿੰਦਾ ਹੈ

ਕਸਮਾਂ ਖਾ ਕੇ ਵਾਅਦੇ ਕਰਕੇ ਵੀ ਔਕਾਤ ਦਿਖਾ ਦਿੰਦਾ ਹੈ
ਬੇਕਦਰਾ ਇਨਸਾਨ ਹਮੇਸ਼ਾ ਸਭ ਅਹਿਸਾਨ ਭੁਲਾ ਦਿੰਦਾ ਹੈ

ਦਰਦ ਵਿਛੋੜੇ ਵਾਲਾ, ਜਦ ਵੀ ਉਠਦੈ , ਜਾਨ ਸੁਕਾ ਦਿੰਦਾ ਹੈ
ਲੇਕਿਨ ਤੇਰੇ ਆਉਣ ਦਾ ਲਾਰਾ, ਜੀਣ ਦੀ ਤਾਂਘ ਵਧਾ ਦਿੰਦਾ ਹੈ

ਬੰਦਾ ਅਪਨੀ ਚੁਸਤੀ ਵਿਚ ਹੀ, ਵਸਦੇ ਘਰ ਵੀਰਾਨ ਕਰੇ,
ਪਰ -ਬੱਚਾ ਤਾਂ ਅਣਭੋਲਪੁਣੇ ਵਿਚ , ਰੋਂਦੇ ਲੋਕ ਹਸਾ ਦਿੰਦਾ ਹੈ

ਤਕੜੇ ਦੇ ਹੱਥ ਦੀ ਕਠਪੁਤਲੀ, ਬਣ ਜਾਂਦੈ ਹਰ ਵਾਰੀ ਹਾਕਮ,
ਮਾਤੜ ਬੰਦਾ ਮੁੜ ਮੁੜ ਉਸਦੇ ਸਿਰ ਤੇ ਤਾਜ ਸਜਾ ਦਿੰਦਾ ਹੈ

ਉਸਦੇ ਬਾਰੇ ਚੰਗੀ ਮੰਦੀ ਹੁੰਦੀ ਰਹਿੰਦੀ ਹਰ ਥਾਂ ਚਰਚਾ,
ਲੱਗਦੈ ਬੰਦਾ ਠੀਕ ਨਹੀਂ ਉਹ, ਐਵੇਂ ਕੌਣ ' ਹਵਾ ' ਦਿੰਦਾ ਹੈ

ਖ਼ੁਦ ‍ਨੂੰ ਦਰਦ ਮਿਲੇ ਤਾਂ ਦਰਦ ਪਰਾਇਆ ਵੀ ਫਿਰ ਲਗਦੈ ਅਪਨਾ,
ਦਰਦ ਮਿਲੇ ਤਾਂ ਦਰਦ ਵੰਡਾਉਣਾ ਏਹੀ ਦਰਦ ਸਿਖਾ ਦਿੰਦਾ ਹੈ

ਆਪੇ ਗੁੱਸੇ ਕਰਕੇ ਉਸਨੂੰ , ਆਪੇ ਫੇਰ ਮਨਾਵਾਂ ਜਦ ਮੈਂ ,
ਮੇਰਾ ਤਰਲਾ, ਉਸਦਾ ਨਖ਼ਰਾ, ਸਾਨੂੰ ਬਹੁਤ ਮਜ਼ਾ ਦਿੰਦਾ ਹੈ

ਯਾਰਾਂ ਦੀ ਜੋ ਭੀੜ ਬੜੀ ਹੈ , ਭੀੜ ਬਣੀ ਤੇ ਪਰਖ ਲਵਾਂਗਾ,
ਕਿਹੜਾ ਯਾਰ ਹਿਤੈਸ਼ੀ ਬਣਦੈ , ਕਿਹੜਾ ਯਾਰ ਦਗ਼ਾ ਦਿੰਦਾ ਹੈ

ਪਿਆਰ-ਮੁਹੱਬਤ , ਮੇਲ -ਵਿਛੋੜਾ , ਦਰਦ , ਤਸੀਹੇ , ਰੋਸੇ , ਧੋਖੇ ,
ਜੋ ਵੀ ਦਿਲ ਨੂੰ ਲੱਗ ਜਾਂਦਾ ਹੈ , ਹੱਥ ਵਿਚ ਕਲਮ ਫੜਾ ਦਿੰਦਾ ਹੈ

ਦਿਲ ਦਾ ਰੋਗ ਅਵੱਲਾ ਹੁੰਦੈ , ਦੇਖੀਂ ' ਮਹਿਰਮ ' ਲਾ ਨਾ ਬੈਠੀਂ ,
ਲਗ ਜਾਵੇ ਤਾਂ ਫਿਰ ਨਾ ਕੋਈ ਵੈਦ ਹਕੀਮ ਦਵਾ ਦਿੰਦਾ ਹੈ

ਦੋ ਰੰਗ ਦੀ ਹੈ ਜ਼ਿੰਦਗੀ..............

2009-02-21T08:12:00.000-08:00

ਦੋ ਰੰਗ ਦੀ ਹੈ ਜ਼ਿੰਦਗੀ, ਰੰਗੀਨ ਵੀ ਵੀਰਾਨ ਵੀ

ਹੈ ਜੀਅ ਰਿਹਾ ਹਰ ਹਾਲ ਵਿੱਚ, ਕੀ ਚੀਜ਼ ਹੈ ਇਨਸਾਨ ਵੀ

ਸੱਚ ਝੂਠ ਹੈ ਇਹ ਜ਼ਿੰਦਗੀ, ਕੰਡਾ ਵੀ, ਹੈ ਇਹ ਫੁੱਲ ਵੀ ,

ਉਲਫ਼ਤ ਵੀ ਹੈ, ਨਫ਼ਰਤ ਵੀ ਹੈ, ਇਖਲਾਕ ਵੀ ਈਮਾਨ ਵੀ

ਹਰ ਸਖਸ਼ ਹੀ ਹੁੰਦਾ ਨਹੀਂ ਨਫ਼ਰਤ ਦਾ ਪਾਤਰ ਦੋਸਤੋ ,

ਕੀਤੇ ਨੇ ਪੈਦਾ ਰੱਬ ਨੇ ਇਨਸਾਨ ਵੀ ਸ਼ੈਤਾਨ ਵੀ

ਹੁੰਦੇ ਕਰੀਬ ਨੇ ਉਹ ਮੇਰੇ, ਫਿਰ ਦੂਰ ਹੋ ਜਾਵਣ ਕਦੇ ,

ਇੱਕ ਪਲ ਚ ਹੁੰਦੇ ਨੇ ਖਫ਼ਾ, ਇੱਕ ਪਲ ਚ ਮੇਹਰਬਾਨ ਵੀ

ਘਰ ਵਿੱਚ ਅਕੇਲੇ ਸਖਸ਼ ਨੂੰ ਆਉਣਾ ਮਜ਼ਾ ਕੀ ਜਸ਼ਨ ਦਾ ,

ਉਹ ਮੇਜ਼ਬਾਨ ਵੀ ਖ਼ੁਦ ਬਣੂ , ਖ਼ੁਦ ਹੀ ਬਣੂ ਮਹਿਮਾਨ ਵੀ

ਬੀਤੇ ਸਮੇਂ ਨੂੰ ਯਾਦ ਜੇਕਰ , ਕਰ ਲਵਾਂ ਅਣਭੋਲ ਮੈਂ ,

ਹੁੰਦਾ ਹੈ ਦਿਲ ਬੇਜ਼ਾਬਤਾ, ਪਰੇਸ਼ਾਨ ਵੀ, ਹੈਰਾਨ ਵੀ

ਰੋਟੀ ਨਹੀਂ ਲੰਗਰ ਬੜੇ , ਕੱਪੜਾ ਨਹੀਂ ਫੈਸ਼ਨ ਬੜੇ ,

ਮਜ਼ਦੂਰ ਵੀ ਨੰਗਾ ਫਿਰੇ, ਭੁੱਖਾ ਮਰੇ ਕਿਰਸਾਨ ਵੀ

ਉਸ ਨੇ ਜ਼ਮਾਨੇ ਨੂੰ ਬੜਾ ਹੀ ਚਾਰਿਆ ਹੈ ਦੋਸਤਾ ,

ਜੋ ਜਾਪਦਾ ਹੈ ਬੇਅਕਲ, ਅਣਜਾਣ ਵੀ, ਨਾਦਾਨ ਵੀ

ਕਿੰਨਾ ਸਿਆਣਾ ਹੋ ਗਿਆ ਇਨਸਾਨ ਮੇਰੇ ਸ਼ਹਿਰ ਦਾ ,

ਰਿਸ਼ਤਾ ਵੀ ਚਾਹੁੰਦਾ ਪਾਲਣਾ , ਦੇਖੇ ਨਫ਼ਾ ਨੁਕਸਾਨ ਵੀ

ਪੈਸਾ ਮਿਲੇ ਤਾਂ ਆਦਮੀ ਸਭ ਕੁਝ ਖਰੀਦੇ ' ਮਹਿਰਮਾ ' ,

ਪਹਿਚਾਨ ਵੀ, ਅਹਿਸਾਨ ਵੀ, ਸਨਮਾਨ ਵੀ, ਭਗਵਾਨ ਵੀ

------------------------------------------------

ਦਿਲ ਤਾਂ ਮੰਗੇ ਇਸ਼ਕ ਚ...

2009-02-10T21:51:00.000-08:00

ਦਿਲ ਤਾਂ ਮੰਗੇ ਇਸ਼ਕ ਚ ਖੁਸ਼ੀਆਂ ਖੇੜੇ ਸੋਨ ਸਵੇਰੇ

ਦਿੰਦੈ ਵਕਤ ਹਮੇਸ਼ਾ ਘੋਰ - ਤਸੀਹੇ , ਘੁੱਪ ਹਨੇਰੇ

ਬੇਵੱਸ ਹੋ ਕੇ ਹੀਰ ਜਦੋਂ ਵੀ ' ਰੰਗਪੁਰ ' ਜਾ ਕੇ ਬੈਠੂ ,

ਸ਼ਾਂਤ ਨਹੀਂ ਕਰ ਸਕਦੇ ' ਰਾਂਝੇ ' ਨੂੰ ' ਗੋਰਖ ' ਦੇ ਡੇਰੇ

ਏਨਾ ਆਖ ਮਰੀ ਪਛਤਾਕੇ ਥਲ ਵਿੱਚ ਸੜਦੀ ਸੱਸੀ,

' ਲੱਗੀ ਵਾਲੇ ' ਸੌਣ ਜਦੋਂ ਵੀ , ਓਦੋਂ ਪੈਣ ਲੁਟੇਰੇ

ਪੇਕੇ ਘਰ ਤੋਂ ਬੇਟੀ ਵੀ ਤਾਂ ਤੁਰਦੀ ਭਰ ਕੇ ਅੱਖਾਂ,

ਡਾਰੋਂ ਵਿੱਛੜੀ ਕੂੰਜ ਕਿਵੇਂ ਨਾ ਚੀਖੇ , ਹੰਝੂ ਕੇਰੇ

ਆ ਤੈਨੂੰ ਅੱਜ ਉਸ ਦੇ ਅੱਗੇ ਝੁਕਦੇ ਸੀਸ ਦਿਖਾਵਾਂ,

ਕੱਲ ਜਿਸ ਦੀ ਪਿੱਠ ਪਿੱਛੇ ਲੋਕਾਂ ਨੇ ਸੀ ਬੁੱਲ ਅਟੇਰੇ

ਦੇਖਣ ਨੂੰ ਤਾਂ ਹਰ ਇੱਕ ਬੰਦਾ ਖੁਸ਼ ਹੀ ਜਾਪੇ , ਲੇਕਿਨ,

ਦਿਲ ਵਿੱਚ ਉਸ ਨੇ ਰੱਖੇ ਹੁੰਦੇ ਦੱਬ ਕੇ ਦੁੱਖ ਬਥੇਰੇ

ਪਰਦੇਸੀ ਮਾਹੀ ਨੇ ਖਬਰੇ ਕਿਸ ਦਿਨ ਮੁੜਨੈ ਘਰ ਨੂੰ ,

ਐਵੇਂ ਕਾਂ ਕਾਂ ਲਾਈ ਰੱਖਦੈ ਨਿੱਤ ਹੀ ਕਾਗ ਬਨੇਰੇ

ਤੈਨੂੰ ਕਾਹਤੋਂ ਅਪਣੀ ਦੁਨੀਆਂ ਲੱਗਦੀ ਸਿਮਟੀ ਸਿਮਟੀ,

ਤੇਰੀ ਮੇਰੀ ਚਰਚਾ ਹੁੰਦੀ ਰਹਿੰਦੀ ਚਾਰ ਚੁਫੇਰੇ

ਤੈਨੂੰ ਮੇਰੇ ਨਾਲ ਰਹੀ ਨਾ ਪਿਆਰ, ਮੁਹੱਬਤ , ਨਫਰਤ,

ਪਰ ਮੈਨੂੰ ਤਾਂ ਆਉਂਦੇ ਰਹਿੰਦੇ ਹੁਣ ਵੀ ਸੁਫਨੇ ਤੇਰੇ

ਦਿਲ ਭੈੜਾ ਹਮਦਰਦਾਂ ਅੱਗੇ ਫਿੱਸ ਪੈਂਦਾ ਕਿਉਂ ' ਮਹਿਰਮ ',

ਉਲਫਤ ਵਿੱਚ ਤਾਂ ਰੱਖਣੇ ਪੈਂਦੇ ਪਰਬਤ ਵਰਗੇ ਜੇਰੇ

--------------------------------------------------

ਉਹ ਖੁਦਾ ਹੋ ਗਿਆ ਲਗਦਾ ਹੈ

2009-02-10T21:47:00.000-08:00

ਓਹ ਜਦ ਵੀ ਖਫ਼ਾ ਹੋ ਗਿਆ ਲਗਦਾ ਹੈ

ਮੈਥੋਂ ਕੁਝ ਬੁਰਾ ਹੋ ਗਿਆ ਲਗਦਾ ਹੈ

ਲਗਦਾ ਸੀ ਮੇਰੇ ਨਾਲ ਬੁਰਾ ਨਹੀਂ ਹੋ ਸਕਦਾ,

ਇਹ ਵੀ ਕਈ ਦਫਾ ਹੋ ਗਿਆ ਲਗਦਾ ਹੈ

ਉਸਦੀ ਹਰਕਤ ਦੱਸਦੀ ਮੇਰੇ ਤੇ ਉਸ ਨੂੰ ,

ਕੋਈ ਸ਼ੱਕ ਸ਼ੁਬਾ ਹੋ ਗਿਆ ਲਗਦਾ ਹੈ

ਕੀ ਆਖਾਂ ਜਦੋਂ ਭਾਲਿਆਂ ਮਿਲਦਾ ਨਈਂ,

ਅੱਜ ਕਲ ਉਹ ਖ਼ੁਦਾ ਹੋ ਗਿਆ ਲਗਦਾ ਹੈ

ਅੱਖਰ ਮਿਟ ਗਏ ਧੱਬੇ ਦਿਸਣ ਸਿਆਹੀ ਦੇ,

ਤੈਥੋਂ ਖ਼ਤ ਗਿੱਲਾ ਹੋ ਗਿਆ ਲਗਦਾ ਹੈ

ਉਹਦੀ ਸੂਰਤ ਦੱਸਦੀ ਹੈ ਹੁਣ ਉਹਦੇ ਤੇ ,

ਸ਼ੀਸ਼ਾ ਵੀ ਫਿਦਾ ਹੋ ਗਿਆ ਲਗਦਾ ਹੈ

ਯਾਰੀ, ਰਿਸ਼ਤੇਦਾਰੀ , ਸੱਚੀ ਹਮਦਰਦੀ ,

ਸਭ ਕੁਝ ਹੀ ਹਵਾ ਹੋ ਗਿਆ ਲਗਦਾ ਹੈ

ਦਿੰਦਾ ਏ ਦੁੱਖ ਬਿਰਹਾ ਸਭ ਨੂੰ ਇਸ਼ਕੇ ਵਿੱਚ ,

ਮੈਨੂੰ ਤਾਂ ਇਹ ਵਫ਼ਾ ਹੋ ਗਿਆ ਲਗਦਾ ਹੈ

ਜਦ ਤੱਕ ਉਹ ਅੱਖ ਮੇਲੇ , ਹੱਸੇ , ਬੋਲੇ ਨਾ ,

ਰੂਹ ਤੋਂ ਬੁੱਤ ਜੁਦਾ ਹੋ ਗਿਆ ਲਗਦਾ ਹੈ

ਉਸਦੀ ਸੂਰਤ , ਸੀਰਤ , ' ਮਹਿਰਮ ' ਐਸੀ ਹੈ ,

ਹਰ ਕੋਈ ਫਿਦਾ ਹੋ ਗਿਆ ਲਗਦਾ ਹੈ

ਖ਼ੁਦ ਹੀ ਖ਼ੁਦ ਨੂੰ ਕਹਿ ਰਿਹਾ ' ਪਾਗਲ ' ਕਮਲਾ ,

' ਮਹਿਰਮ ' ਨੂੰ ਸ਼ੁਦਾ ਹੋ ਗਿਆ ਲਗਦਾ ਹੈ

---------------------------------

ਕਿਸ ਤਰਾਂ ਦਾ ਰਾਜ ਤੇਰਾ...

2009-02-10T21:36:00.000-08:00

ਕੀ ਵਜਾ ਹਰ ਤਰਫ਼ ਮਚਦੀ ਰੋਜ਼ ਹਾਹਾਕਾਰ ਹੈ /
ਕਿਸ ਤਰਾਂ ਦਾ ਰਾਜ ਤੇਰਾ ਕੀ ਤੇਰੀ ਸਰਕਾਰ ਹੈ /

ਕੀ ਹੈ ਇਸ ਵਿੱਚ ਰਾਜ਼ , ਸਭ ਕੁਝ ਕਿਉਂ ਅਮੀਰਾਂ ਵਾਸਤੇ ,
ਤੁੰ ਉਨਾਂ ਤੋਂ ਪੁੱਛ ਜਿਨਾਂ ਦੇ ਕੋਲ ਕੋਠੀ ਕਾਰ ਹੈ /

ਚੁਣ ਰਹੇ ਜੇ ਲੋਕ ਅੱਖਾਂ ਮੀਟ ਕੇ ਨੇ ਰਹਿਨੁਮਾ ,
ਦੇ ਰਹੀ ਉਸ ਜ਼ੁਰਮ ਦੀ ਸਭ ਨੂੰ ਸਜ਼ਾ ਸਰਕਾਰ ਹੈ /

ਡਿਗਰੀਆਂ ਨੂੰ ਮਾਰ ਕੱਛੇ ਫਿਰ ਰਹੇ ਨੇ ਦਰ-ਬ-ਦਰ ,
ਕਾਮਿਆਂ ਦੀ ਭੀੜ ਬੈਠੀ ਚੌਂਕ ਵਿੱਚ ਬੇਕਾਰ ਹੈ /

ਦਿਨ ਢਲੇ ਬਦਨਾਮ ਲੋਕਾਂ ਦਾ ਬਣੇ ਮਹਿਮਾਨ ਜੋ ,
ਦਿਨ ਚੜੇ ਤੇ ਜੋੜ ਕੇ ਹੱਥ ਭਾਲਦਾ ਸਤਿਕਾਰ ਹੈ /

ਛੱਡ ਦਿਲਾ ਮਤ ਰੋਕ ਉਸ ਨੂੰ ਜਾ ਰਿਹਾ ਜੋ ਜਾਣ ਦੇ ,
ਪੈਸੇ ਦੀ ਭੱਜ-ਦੌੜ ਦੇ ਵਿੱਚ ਸੁਣਦਾ ਕੌਣ ਪੁਕਾਰ ਹੈ /

ਹਰ ਗਲੀ ਦੇ ਮੋੜ ਤੇ ਹੁਣ ਖੁੱਲ ਗਿਆ ਹੈ ਮੈਅਕਦਾ ,
ਦੋਸਤਾ ਸਰਕਾਰ ਸਾਡੀ ਦਾ ਬੜਾ ਉਪਕਾਰ ਹੈ /

ਮਿਲ ਰਿਹਾ ਨਾ ਚੈਨ ਦਿਲ ਨੂੰ , ਮੈਂ ਖ਼ਬਰ ਕਿਸ ਤੋਂ ਲਵਾਂ ,
ਕੀ ਪਤਾ ਕਿਸ ਹਾਲ ਵਿੱਚ ਬੈਠੀ ਮੇਰੀ ਸਰਕਾਰ ਹੈ /

ਇਸ਼ਕ ਦੇ ਵਣਜਾਰਿਆਂ ਦੀ , ਪਰਖ ਹੋਣੀ ਉਸ ਘੜੀ ,
ਜਦ ਬਣੀ ਦੀਵਾਰ ਦੁਨੀਆਂ ਦੋ ਦਿਲਾਂ ਵਿਚਕਾਰ ਹੈ /

ਤੂੰ ਕਿਸੇ ਨੂੰ ਅਕਲ ਨਾ ਦੇ , ਤੂੰ ਕਿਸੇ ਨੂੰ ਟੋਕ ਨਾ ,
ਹਰ ਬਸ਼ਰ ਹੀ ਸਮਝਦਾ ਖ਼ੁਦ ਨੂੰ ਬੜਾ ਫ਼ਨਕਾਰ ਹੈ /

' ਮਹਿਰਮਾ ' ਕਰ ਹੋਸ਼ , ਨਾ ਕਰ ਦੌਲਤਾਂ ਦਾ ਮਾਣ ਤੂੰ ,
ਉਹ ਸਮੇਂ ਨੇ ਮਾਰਿਆ ਜੋ ਕਰ ਗਿਆ ਹੰਕਾਰ ਹੈ /
----------------------------------------------

ਵਗਦੀਆਂ ਦੇਖ ਕੇ .....

2009-02-10T21:33:00.000-08:00

ਵਗਦੀਆਂ ਦੇਖ ਕੇ ਪਿੰਡੀਂ ਸ਼ਹਿਰੀਂ ਤੱਤੀਆਂ ਤੇਜ਼ ਹਵਾਵਾਂ ☬

ਅਪਨੇ ਆਪ ਨੂੰ ਪੁੱਛਦੈ ਬੰਦਾ ਕਿੱਧਰ ਨੂੰ ਤੁਰ ਜਾਵਾਂ ☬

ਬਾਹਰੋਂ ਡਰ ਕੇ ਘਰ ਨੂੰ ਆ ਜਾਊ , ਘਰ ਤੋਂ ਜਾਊ ਕਿੱਥੇ ,

ਜਿਸ ਨੂੰ ਸਦਾ ਡਰਾਉਂਦਾ ਰਹਿੰਦਾ ਆਪਣਾ ਹੀ ਪਰਛਾਵਾਂ ☬

ਹੱਤਿਆਵਾਂ , ਖ਼ੁਦਕਸ਼ੀਆਂ , ਚੋਰੀਆਂ ,ਡਾਕੇ , ਬੰਬ ਧਮਾਕੇ ,

ਕਿੱਧਰੋਂ ਆ ਕੇ ਚਿੰਬੜ ਗਈਆਂ ਸਾਨੂੰ ਕਈ ਬਲਾਵਾਂ ☬

ਬੇਰੁਜ਼ਗਾਰੀ, ਚੋਰ -ਬਜ਼ਾਰੀ, ਰਿਸ਼ਵਤਖੋਰੀ ਵਧ ਗਈ ,

ਸਰਕਾਰਾਂ ਦੇ ਜਲਵੇ ਨੇ , ਕੀ ਸਿਫ਼ਤਾਂ ਹੋਰ ਸੁਣਾਵਾਂ ☬

ਪੋਸਤ, ਭੁੱਕੀ, 'ਫੀਮ, ਸ਼ਰਾਬਾਂ, ਨਿਕ-ਸੁਕ ਵੋਟਾਂ ਵੇਲੇ ,

ਲੋਕਾਂ ਦੇ ਘਰ ਜਾ ਜਾ ਵੰਡਿਆ ਹੱਥੀਂ ਆਪ ਨੇਤਾਵਾਂ ☬

ਘਰ ਦਾ ਵਿਹੜਾ, ਸੜਕਾਂ , ਰਸਤੇ, ਰੁੱਖਾਂ ਬਿਨ ਸੱਖਣੇ ਨੇ ,

ਲੋੜ ਪਈ ਜੇ ਲੱਭਣ ਤੁਰੀਏ ਦਿਸਦਾ ਟਾਵਾਂ ਟਾਵਾਂ ☬

ਵੀਰਾਂ ਦੀ ਬਾਂਹ ਹੁੰਦੇ ਵੀਰੇ , ਇਹ ਗੱਲ ਦਿਲ ਨਹੀਂ ਮੰਨਦਾ,

ਦੌਲਤ ਖਾਤਿਰ ਮਾਰ ਦਿੱਤਾ ਹੈ ਕੱਲ ਇੱਕ ਵੀਰ, ਭਰਾਵਾਂ ☬

ਸ਼ੇਰਾਂ ਵਰਗੇ ਪੁੱਤਰਾਂ ਨੂੰ ਜਦ ਘੁਣ ਨਸ਼ਿਆਂ ਦਾ ਲੱਗੇ ,

ਢਿੱਡ ਵਿੱਚ ਮੁੱਕੀਆਂ ਮਾਰਨ, ਵਿਲਕਣ , ਤੜਫਣ, ਝੂਰਨ ਮਾਵਾਂ ☬

ਮਾਰ ਦਿੱਤੀ ਹੈ ਜਨਮ ਤੋਂ ਪਹਿਲਾਂ ਕੁੱਖ ਵਿੱਚ ਧੀ ਅੱਜ ਜਿਸਨੇ ,

ਪੁੱਤਰ ਲਈ ਕੱਲ ਪੁੱਛਣਾ ਉਸ ਨੇ ਕੁੜੀਆਂ ਦਾ ਸਿਰਨਾਵਾਂ ☬

ਕੁੱਲੀ, ਗੁੱਲੀ , ਜੁੱਲੀ ਦਾ ਸਰਕਾਰ ਕਰੇ ਹੱਲ , ਨਹੀਂ ਤਾਂ ,

ਆ ਰਹੇ ਵਕਤ ਨੇ ਘੱਟ ਨਈਂ ਕਰਨੀ ਦੇਣੀਆਂ ਸਖ਼ਤ ਸਜ਼ਾਵਾਂ ☬

ਹਰ ਥਾਂ ਬੂਟੇ ਲਾਵੋ ' ਮਹਿਰਮ ' , ਤਾਂ ਹੀ ਮਾਣ ਸਕਾਂਗੇ ,

ਫਲ , ਫੁੱਲ , ਮਹਿਕਾਂ , ਪਿੱਪਲੀਂ ਪੀਂਘਾਂ ਤੇ ਤੂਤਾਂ ਦੀਆਂ ਛਾਵਾਂ ☬

---------------------------------------------------------

ਜੇ ਕਦੇ ਨਾ ਹਾਦਸੇ ਹੁੰਦੇ ....

2009-02-10T21:30:00.000-08:00

ਜ਼ਿੰਦਗੀ ਵਿੱਚ ਜੇ ਕਦੇ ਨਾ ਹਾਦਸੇ ਹੁੰਦੇ
ਰਿਸ਼ਤਿਆਂ ਵਿੱਚ ਇਸ ਤਰਾਂ ਨਾ ਫਾਸਲੇ ਹੁੰਦੇ

ਦੁਸ਼ਮਣੀ ਵਿੱਚ ਦੁਸ਼ਮਣਾਂ ਦਾ ਇਲਮ ਹੁੰਦਾ ਹੈ ,
ਦੋਸਤਾਂ ਦੇ ਵਾਰ ਹੀ ਨੇ ਢਕੇ - ਛਿਪੇ ਹੁੰਦੇ

ਸ਼ੀਸ਼ਿਆਂ ਦੇ ਘਰ ਬਣਾ ਕੇ, ਸ਼ੌਕ ਲੋਕਾਂ ਦਾ ,
ਹਰ ਜਗਹ ਪੱਥਰ ਸਜਾ ਕੇ ਵੀ ਧਰੇ ਹੁੰਦੇ

ਜੀ - ਹਜ਼ੂਰੀ ਸਿੱਖਦਾ , ਕਰਦਾ ਕਦੇ ਚੁਗਲੀ ,
ਜ਼ਿੰਦਗੀ ਭਰ ਫਿਰ ਬੜੇ ਤੇਰੇ ਮਜ਼ੇ ਹੁੰਦੇ

ਜਦ ਕਦੇ ਇਲਜ਼ਾਮ ਲੱਗਾ, ਵਕਤ ਮੰਦਾ ਸੀ ,
ਆਦਮੀ ਤਾਂ ਹਰ ਜਗਹ ਚੰਗੇ - ਭਲੇ ਹੁੰਦੇ

ਨਾ ਜਰੇ ਘਰ ਵਿੱਚ ਜੋ ਮਹਿਮਾਨ ਦੀ ਆਮਦ ,
ਮਹਿਫਿਲਾਂ ਵਿੱਚ ਓਸਦੇ ਨਖ਼ਰੇ ਬੜੇ ਹੁੰਦੇ

ਤੂੰ ਕਿਵੇਂ ਪਰਵਾਜ਼ ਭਰਦਾ ਪੰਛੀਆ ਏਦਾਂ ,
ਜ਼ਾਲਮਾਂ ਨੇ ਜੇ ਤੇਰੇ ਵੀ ਪਰ ਕਟੇ ਹੁੰਦੇ

ਦਿਲ ਕਰੇਂ ਜੇ ਸਾਫ਼ ਤਾਂ ਗੱਲ ਖੁੱਲ ਕੇ ਹੋਣੀ ,
ਬੰਦਸ਼ਾਂ ਵਿੱਚ ਦੂਰ ਨਹੀਂ ਗੁੱਸੇ - ਗਿਲੇ ਹੁੰਦੇ

ਨਾ ਦਿਸੇਂ ਤਾਂ ਫਿਰ ਬੜਾ ਬੇਚੈਨ ਰਹਿੰਦਾ ਦਿਲ,
ਮਿਲਣ ਤੇ ਵੀ ਜਖ਼ਮ ਦਿਲ ਦੇ ਹੀ ਹਰੇ ਹੁੰਦੇ

ਤੜਪਣਾ , ਵੈਰਾਗ , ਵਾਦੇ , ਭਟਕਣਾ ' ਮਹਿਰਮ ',
ਇਸ਼ਕ ਵਿੱਚ ਨੇ ਇਸ ਤਰਾਂ ਦੇ ਸਿਲਸਿਲੇ ਹੁੰਦੇ

ਕਿਸ ਤਰਾਂ ਬੰਦਾ ਕੋਈ ਖੁਸ਼ ਰਹਿ ਸਕੇ ' ਮਹਿਰਮ ',
ਸਾਥ ਉਸਦੇ ਜਦ ਗ਼ਮਾਂ ਦੇ ਕਾਫਲੇ ਹੁੰਦੇ
--------------------------------------------

ਕਰਦਾ ਰਿਹਾ ਮਹਿਬੂਬ ਵਲ ਛਲ ..

2009-02-10T21:26:00.001-08:00

ਕਰਦਾ ਰਿਹਾ ਮਹਿਬੂਬ , ਵਲ ਛਲ ਹਰ ਸਮੇਂ ਕਰਦਾ ਰਿਹਾ
ਜਰਦਾ ਰਿਹਾ ਦਿਲ ਸਭ , ਸਮਝ ਉਸਦੀ ਰਜਾ ਜਰਦਾ ਰਿਹਾ

ਮਰਦਾ , ਤਾਂ ਮੈਂ ਮਰਦਾ , ਉਦੇ ਈਮਾਨ ਤੇ ਇਖਲਾਕ ਤੇ,
ਦੀਵਾਨਗੀ ਸੀ ਜੋ ਉਦੇ , ਮੈਂ ਰੂਪ ਤੇ ਮਰਦਾ ਰਿਹਾ

ਡਰਿਆ ਨਹੀਂ ਸੀ ਜੋ ਕਿਸੇ ਤੋਂ, ਜ਼ੁਲਮ ਕਰਦਾ ਰਾਤ ਦਿਨ,
ਸ਼ੀਸ਼ੇ ਚ ਖੁਦ ਨੂੰ ਦੇਖ , ਅਪਨੇ ਆਪ ਤੋਂ ਡਰਦਾ ਰਿਹਾ

ਹਰਦਾ ਜਦੋਂ ਇਨਸਾਨ , ਦਿੰਦੀ ਹਾਰ ਵੀ ਹਿੰਮਤ ਬੜੀ ,
ਟੁੱਟਾ ਜਦੋਂ ਵਿਸ਼ਵਾਸ਼ , ਬੰਦਾ ਜਿੱਤ ਕੇ ਹਰਦਾ ਰਿਹਾ

ਕਰ ਤੂੰ ਭਲਾ ਮਜ਼ਲੂਮ ਦਾ , ਦੇਵੇ ਦੁਆ ਜੋ ਤਹਿ ਦਿਲੋਂ ,
ਮਿੱਟੀ ਬਣੂ ਅਹਿਸਾਨ , ਜੇ ਖੁਦਗਰਜ਼ ਤੇ ਕਰਦਾ ਰਿਹਾ

ਠਰਦਾ ਨਹੀਂ ਸੀਨਾ ਮੇਰਾ , ਬਿਰਹਾ ਜਲਾਵੇ ਓਸ ਦਾ ,
ਮਿਲਦੀ ਰਹੀ ਉਸ ਦੀ ਖਬਰ , ਹਿਰਦਾ ਮੇਰਾ ਠਰਦਾ ਰਿਹਾ

ਭਰਿਆ ਨਹੀਂ ਦਿਲ ਦਾ , ਕਦੇ ਵੀ ਜ਼ਖਮ , ਪਰ ਰਿਸਿਆ ਉਦੋਂ ,
ਕਰ ਕੇ ਕਿਸੇ ਨੂੰ ਯਾਦ ਮੇਂ , ਹੌਕਾ ਜਦੋਂ ਭਰਦਾ ਰਿਹਾ

ਤਰਨਾ ਬੜਾ ਔਖਾ , ਜਦੋਂ ਬੇੜੀ ਫਸੇ ਮੰਝਧਾਰ ਵਿੱਚ ,
ਜੋ ਹੌਸਲਾ ਕਰਦਾ ਰਿਹਾ , ਦਰਿਆ ਉਹੀ ਤਰਦਾ ਰਿਹਾ

ਡਰ ਸੀ ਉਦਾ ਜਾਂ ਵਹਿਮ ਸੀ , ਲੱਗਿਆ ਪਤਾ ਨਹੀਂ ਯਾਰ ਦਾ ,
ਇਜ਼ਹਾਰ ਵੀ ਕਰਦਾ ਰਿਹਾ , ਇਕਰਾਰ ਤੋਂ ਡਰਦਾ ਰਿਹਾ

ਸਰਦਾ ਇਵੇਂ ਹੈ ' ਮਹਿਰਮਾ ' , ਸਭ ਦਾ ਕਿਸੇ ਦਿਲਦਾਰ ਬਿਨ ,
ਮੇਰਾ ਜਿਵੇਂ ਸਰਦਾ ਰਿਹਾ , ਤੇਰਾ ਜਿਵੇਂ ਸਰਦਾ ਰਿਹਾ
---------------------------------------------------

ਦਿਲ ਤੋੜ ਕੇ ਤੁਰ ਪੈਂਦਾ ................

2009-02-10T21:21:00.000-08:00

ਦਿਲ ਤੋੜ ਕੇ ਤੁਰ ਪੈਂਦਾ, ਦਿਲਦਾਰ ਜਦੋਂ ਮਰਜੀ

ਫਿਰ ਯਾਦ ਕਰੇ ਉਸਦੀ, ਬੇਜ਼ਾਰ ਜਦੋਂ ਮਰਜੀ

ਇਜ਼ਹਾਰ ਕਰੇ ਡਟ ਕੇ, ਇਕਰਾਰ ਨਹੀਂ ਕਰਦਾ,

ਉਲਫ਼ਤ ਚ ਸੁਣੋ ਉਸ ਤੋਂ, ਇਨਕਾਰ ਜਦੋਂ ਮਰਜੀ

ਵਿਸ਼ਵਾਸ਼ ਕਿਵੇਂ ਹੋਵੇ , ਕੱਲ ਫੇਰ ਮਿਲੂ ਆ ਕੇ,

ਮਹਿਬੂਬ ਜਿਵੇਂ ਕਰਦੈ, ਤਕਰਾਰ ਜਦੋਂ ਮਰਜੀ

ਖ਼ਾਮੋਸ਼ ਮੁਹੱਬਤ ਵੀ, ਤਾਂ ਯਾਰ ਸਜ਼ਾ ਹੀ ਹੈ,

ਤੂੰ ਸ਼ੋਖ ਅਦਾਵਾਂ ਦਾ , ਕਰ ਵਾਰ ਜਦੋਂ ਮਰਜੀ

ਹੈ ਸ਼ੌਕ ਅਮੀਰਾਂ ਦਾ, ਜਾਂ ਮਾਣ ਅਮੀਰੀ ਦਾ,

ਕਿਉਂ ਦੇਣ ਗਰੀਬਾਂ ਨੂੰ, ਫਿਟਕਾਰ ਜਦੋਂ ਮਰਜੀ

ਦਿਨ ਰਾਤ ਚੁਰਾ ਦੌਲਤ, ਘਰ ਬਾਰ ਭਰੇ ਨੇਤਾ,

ਚੱਲੇ ਜਾਂ ਭਲਾ ਡਿੱਗੇ, ਸਰਕਾਰ ਜਦੋਂ ਮਰਜੀ

ਨਹੀਂ ਆਪ ਅਮਲ ਕਰਦਾ, ਉਹ ਸਖਸ਼ ਅਸੂਲਾਂ ਤੇ,

ਮਹਿਫਿਲ ਚ ਸੁਣੋ ਉਸ ਤੋਂ, ਪਰਚਾਰ ਜਦੋਂ ਮਰਜੀ

ਜੋ ਸੀਸ ਤਲੀ ਧਰਦੇ , ਉਹ ਦੇਣ ਇਹੀ ਹੋਕਾ,

ਕਾਤਿਲ ਨੂੰ ਕਹੋ ਪਰਖੇ, ਤਲਵਾਰ ਜਦੋਂ ਮਰਜੀ

ਨਿਰਦੋਸ਼ ਲਹੂ ਡੁੱਲੇ, ਮਜ਼ਲੂਮ ਰਹੇ ਮਰਦਾ,

ਮਗ਼ਰੂਰ ਉਠਾ ਲੈਂਦੈ, ਹਥਿਆਰ ਜਦੋਂ ਮਰਜੀ

ਇਹ ਨੈਣ ਅਸਾਡੇ ਵੀ, ਤੱਕ ਲੈਣ ਨਜ਼ਰ ਭਰ ਕੇ,

ਤੂੰ ਝਲਕ ਦਿਖਾ ਜਾਵੀਂ, ਇੱਕ ਵਾਰ ਜਦੋਂ ਮਰਜੀ

ਤਸਵੀਰ ਵਸਾ ਦਿਲ ਵਿੱਚ, ਮਹਿਬੂਬ ਦੀ ਇੰਜ ' ਮਹਿਰਮ ',

ਤੁੰ ਸੀਸ ਝੁਕਾ ਤੇ ਕਰ , ਦੀਦਾਰ ਜਦੋਂ ਮਰਜੀ

' ਮਹਿਰਮ ', ਜੀ, ਜ਼ਮਾਨੇ ਵਿੱਚ , ਇਤਬਾਰ ਰਹੂ ਕਿਸ ਤੇ,

ਇਨਸਾਨ ਜਿਵੇਂ ਬਦਲੇ , ਕਿਰਦਾਰ ਜਦੋਂ ਮਰਜੀ

------------------------------------------------

ਜ਼ਮਾਨੇ ਵਿੱਚ ......

2009-02-10T21:16:00.000-08:00

ਜ਼ਮਾਨੇ ਵਿੱਚ ਜਿਦੇ ਵੀ ਨਾਲ ਮਿਲਣਾ ਵਰਤਣਾ ਪੈਂਦੈ
ਬੜਾ ਕੁਝ ਦੇਖਣਾ ਪੈਂਦਾ , ਬੜਾ ਕੁਝ ਸੋਚਣਾ ਪੈਂਦੈ

ਸਮੇਂ ਦੇ ਨਾਲ ਬੰਦੇ ਨੂੰ ਵਤੀਰਾ ਬਦਲਣਾ ਪੈਂਦੈ
ਕਿਸੇ ਨੂੰ ਸੋਧਣਾ ਪੈਂਦੈ , ਕਿਸੇ ਨੂੰ ਬਖਸ਼ਣਾ ਪੈਂਦੈ

ਵਿਛੋੜਾ , ਮੇਲ, ਪਛਤਾਵਾ , ਕਦੇ ਗੁੱਸਾ , ਕਦੇ ਸ਼ਿਕਵਾ ,
ਮੁਹੱਬਤ ਦੇ ਪੁਜਾਰੀ ਨੂੰ ਹਮੇਸ਼ਾ ਝੱਲਣਾ ਪੈਂਦੈ

ਸਿਆਣੇ ਲੋਕ ਵੈਸੇ ਤਾਂ ਮਿਸਾਲਾਂ ਨਾਲ ਸਮਝਾਉਂਦੇ,
ਕਿਸੇ ਮੌਕੇ ਇਸ਼ਾਰੇ ਚੋਂ ਰਮਜ਼ ਨੂੰ ਸਮਝਣਾ ਪੈਂਦੈ

ਮੁਹੱਬਤ ਇਹ ਨਹੀਂ , ਔਲਾਦ ਨੂੰ ਸਿਰ ਚਾੜ ਕੇ ਰੱਖੋ,
ਕੁਰਾਹੇ ਪੈ ਰਿਹਾ ਬੱਚਾ, ਕਦੇ ਤਾਂ ਝਿੜਕਣਾ ਪੈਂਦੈ

ਖਰੇ ਵਾਪਿਸ ਹੀ ਆ ਜਾਵੇ ਉਦੀ ਹਾਰੀ ਹੋਈ ਦੌਲਤ,
ਜੁਆਰੀ ਨੂੰ ਇਸੇ ਹੀ ਆਸ ਤੇ ਫਿਰ ਖੇਡਣਾ ਪੈਂਦੈ

ਅਜੇ ਤੱਕ ਲੋਕ ਸਮਝੇ ਨਾ , ਕੀ ਹੁੰਦੀ ਵੋਟ ਦੀ ਤਾਕਤ,
ਇਸੇ ਕਰਕੇ ਕੁਤਾਹੀ ਦਾ , ਨਤੀਜਾ ਭੁਗਤਣਾ ਪੈਂਦੈ

ਨਹੀਂ ਹੁੰਦਾ ਭਲਾ ਏਦਾਂ ' ਭਲਾ ' ਆਖੋ ਜੇ ਹਰ ਵੇਲੇ,
ਭਲੇ ਦੇ ਵਾਸਤੇ ਯਾਰੋ, ' ਬੁਰਾ ' ਵੀ ਬੋਲਣਾ ਪੈਂਦੈ

ਬੜਾ ਇਨਸਾਫ ਕਰਦੇ ਨੇ , ਉਹ ਕਾਤਿਲ ਤੱਕ ਬਰੀ ਕਰਕੇ ,
ਤਦੇ ਨਿਰਦੋਸ਼ ਲੋਕਾਂ ਨੂੰ , ਸਜ਼ਾ ਨੂੰ ਭੁਗਤਣਾ ਪੈਂਦੈ

ਨਹੀਂ ਬਣਦਾ ਕਦੇ ਮੰਜ਼ਿਲ , ਚੁਰਸਤੇ ਦਾ ਹਰਿਕ ਰਸਤਾ ,
ਕਿਸੇ ਤੋਂ ਪਰਤਣਾ ਪੈਂਦੈ , ਕਿਸੇ ਤੇ ਭਟਕਣਾ ਪੈਂਦੈ

ਅਗਰ ਅਣਜਾਣ ਏਂ ਤਾਂ ਜਾਚ ਇਹ ਸਿੱਖ ਲੈ ਪਰਿੰਦੇ ਤੋਂ,
ਉਡਾਰੀ ਭਰਨ ਤੋਂ ਪਹਿਲਾਂ , ਪਰਾਂ ਨੂੰ ਤੋਲਣਾ ਪੈਂਦੈ

ਨਾ ਛਾਲਾਂ ਮਾਰ ਤੂੰ ' ਮਹਿਰਮ ' , ਤਸੱਲੀ ਨਾਲ ਚੜ ਪੌੜੀ,
ਕਦਮ ਉੱਖੜੇ ਤਾਂ ਹੇਠਾਂ ਨੂੰ , ਸਿਖਰ ਤੋਂ ਡਿੱਗਣਾ ਪੈਂਦੈ
--------------------------------------------------------

ਬੁਰਾ ਕੀ ਹੋ ਰਿਹਾ ਹੈ ?.......

2009-02-10T21:05:00.000-08:00

ਸੋਚ ਨਾ ਅੱਜ ਕਲ ਜ਼ਮਾਨੇ ਵਿੱਚ ਬੁਰਾ ਕੀ ਹੋ ਰਿਹਾ ਹੈ ?
ਦੇਖਣਾ ਤਾਂ ਦੇਖ , ਤੇਰੇ ਤੋਂ ਭਲਾ ਕੀ ਹੋ ਰਿਹਾ ਹੈ ?

ਸਭ ਦਿਲਾਂ ਤੇ ਜਖ਼ਮ ਲੱਭਣੇ , ਜਾ ਇਨਾਂ ਨੂੰ ਛੇੜ ਬੈਠੇ ,
ਰਹਿਣ ਦੇ, ਮਤ ਦੇਖ , ਪਰਦਾ ਨਾ ਹਟਾ, ਕੀ ਹੋ ਰਿਹਾ ਹੈ ?

ਆਖਦੇ ਸੀ ਚੋਰ ਦੇ ਘਰ ਵਿੱਚ ਕਦੇ ਨਹੀਂ ਦੀਪ ਜਗਦਾ ,
ਜਗਮਗਾਂਦਾ ਦੇਖ ਸਾਰਾ ਘਰ ਉਦਾ , ਕੀ ਹੋ ਰਿਹਾ ਹੈ ?

ਪਾ ਰਹੇ ਨੇ ਸਾਫ਼ ਬਸਤਰ , ਪਰ ਦਿਲਾਂ ਵਿੱਚ ਮੈਲ ਰੱਖਣ ,
ਤੁੰ ਉਨਾਂ ਦਾ ਯਾਰ ਏਂ , ਤੈਨੂੰ ਪਤਾ ਕੀ ਹੋ ਰਿਹਾ ਹੈ ?

ਵੋਟ ਦੇ ਕੇ ਲੋਕ ਸੋਚਣ , ਹੁਣ ਅਸਾਡਾ ਰਾਜ ਆਊ,
ਲੀਡਰਾਂ ਦੀ ਸੋਚ ਹੈ , ਸਾਨੂੰ ਨਫ਼ਾ ਕੀ ਹੋ ਰਿਹਾ ਹੈ ?

ਡਾਢਿਆਂ ਦੇ ਜ਼ੋਰ ਅੱਗੇ ਕਦ ਕਿਸੇ ਦੀ ਪੇਸ਼ ਚੱਲੂ ,
ਪਾ ਰਹੇ ਨਿਰਦੋਸ਼ ਹਾਲੇ ਤਾਂ ਸਜ਼ਾ, ਕੀ ਹੋ ਰਿਹਾ ਹੈ ?

ਲੱਤਾਂ ਇਸ ਦੀਆਂ ਕਬਰ ਵਿੱਚ ਨੇ , ਖਾ ਸਕੇ ਨਾ ਲੂਣ , ਮਿੱਠਾ,
ਲੋਭ ਫਿਰ ਵੀ ਦੌਲਤਾਂ ਦਾ , ਐ ਖ਼ੁਦਾ ਕੀ ਹੋ ਰਿਹਾ ਹੈ ?

ਦੇ ਰਿਹਾ ਕੀ ਲੋਕਤੰਤਰ , ਦੇ ਰਹੀ ਕੀ ਵੋਟ ਪਰਚੀ ,
ਲੋਕ ਕੁਝ ਵੀ ਸਮਝਦੇ ਨਹੀਂ , ਤੂੰ ਸੁਣਾ ਕੀ ਹੋ ਰਿਹਾ ਹੈ ?

" ਮਹਿਰਮਾ ' ਇਸ ਦੌਰ ਵਿੱਚ ਕੁਝ ਬਦਲ ਜਾਊ ਆਸ ਨਾ ਕਰ,
ਹੋ ਰਿਹਾ ਇਹ ਅਜ਼ਲ ਤੋਂ ਹੀ , ਹੁਣ ਜੁਦਾ ਕੀ ਹੋ ਰਿਹਾ ਹੈ ?
---------------------------------------------------

ਕੀ ਹੈ ਉਨਾਂ ਦਾ ਹਾਲ ............

2009-02-10T21:03:00.000-08:00

ਕੀ ਹੈ ਉਨਾਂ ਦਾ ਹਾਲ ਜਦ ਤੱਕ ਇਹ ਪਤਾ ਮਿਲਦਾ ਨਹੀਂ
ਮੈਂ ਵੀ ਰਹਾਂ ਬੇਚੈਨ ਦਿਲ ਨੂੰ ਵੀ ਟਿਕਾ ਮਿਲਦਾ ਨਹੀਂ

ਤੁੰ ਤੁਰ ਪਿਆਂ ਅਣਜਾਣ ਮੰਜ਼ਿਲ ਵੱਲ ਦਿਲਾ ਕੀ ਸੋਚ ਕੇ ,
ਜਿਸਦਾ ਸਫ਼ਰ ਐਸਾ ਕਿ ਜਿਸਦਾ ਥਹੁ ਪਤਾ ਮਿਲਦਾ ਨਹੀਂ

ਤੈਨੂੰ ਬੜਾ ਹੈ ਮਾਣ ਦਰਿਆ ਕਰ ਲਵੇਂਗਾ ਪਾਰ ਤੂੰ ,
ਰੁਕ ਜਾ , ਅਜੇ ਨਾ ਜਾਹ , ਜਦੋਂ ਤੱਕ ਨਾਖ਼ੁਦਾ ਮਿਲਦਾ ਨਹੀਂ

ਉਹ ਕਰ ਗਿਆ ਇਜ਼ਹਾਰ ਅਪਨੀ ਬੇਬਸੀ ਦਾ ਇਸ ਤਰਾਂ ,
ਮੈਂ ਕਰ ਲਵਾਂ ਮਨਜ਼ੂਰ ਏਨਾ ਹੌਸਲਾ ਮਿਲਦਾ ਨਹੀਂ

ਬਸ ਇੱਕ ਉਦੀ ਤਸਵੀਰ ਅੱਖਾਂ ਸਾਹਮਣੇ ਫਿਰਦੀ ਰਹੇ ,
ਦਿਲ ਤੜਫਦਾ ਉਸ ਲਈ ਜਿਦਾ ਮੂੰਹ ਦੇਖਣਾ ਮਿਲਦਾ ਨਹੀਂ

ਉਸਦਾ ਕਰਮ ਜਦ ਹੋ ਗਿਆ ਤਾਂ ਮਿਲ ਗਿਆ ਸਾਰਾ ਜਹਾਂ,
ਜਦ ਉਹ ਖਫ਼ਾ ਹੋਵੇ ਕਿਤੇ ਵੀ ਆਸਰਾ ਮਿਲਦਾ ਨਹੀਂ

ਤੈਨੂੰ ਕਰਾਂ ਮੈਂ ਯਾਦ ਹਰ ਥਾਂ , ਘਰ ਤੇਰੇ ਕੀ ਆਵਣਾ ,
ਉਸ ਘਰ ਮਿਲੇ ਪਰਚਾਰ ਹੀ , ਤੂੰ ਮਾਲਕਾ ਮਿਲਦਾ ਨਹੀਂ

ਚੱਲਦਾ ਨਹੀਂ ਇਸ ਖੇਲ ਵਿੱਚ ਕੋਈ ਜ਼ੋਰ ਤਰਲਾ " ਮਹਿਰਮਾ ',
ਬਿਨ ਕਿਸਮਤਾਂ ਦੇ ਮੀਤ ਦਿਲ ਦਾ ਪਾਗਲਾ ਮਿਲਦਾ ਨਹੀਂ
------------------------------------------------

ਯਾਰਾ ਮਸਜਿਦ ਮੰਦਰ ਦੇਖ

2009-02-10T21:01:00.000-08:00

ਯਾਰਾ ਮਸਜਿਦ ਮੰਦਰ ਦੇਖ
ਰੱਬ ਖ਼ੁਦਾ ਕਿਸ ਅੰਦਰ ਦੇਖ

ਸਭ ਕੁਝ ਕਾਜ਼ੀ ਪੰਡਤ ਹੱਥ,
ਕੈਦ 'ਚ ਪੀਰ ਪਗੰਬਰ ਦੇਖ

ਬੋਲ ਰਿਹਾ ਜੋ ਸੁੱਚੇ ਬੋਲ,
ਮੈਲ ਪੁਜਾਰੀ ਅੰਦਰ ਦੇਖ

ਮਿਹਨਤਕਸ਼ ਨੇ ਭੁੱਖੇ ਪੇਟ ,
ਵਿਹਲੜ ਛਕਦਾ ਲੰਗਰ ਦੇਖ

ਪੈਸੇ ਵਾਲੇ ਦਾ ਹੈ ਨਾਮ ,
ਲੱਗਾ ਜੋ ਸੰਗਮਰਮਰ ਦੇਖ

ਲਹਿਰਾਂ ਦਾ ਕੀ ਹੁੰਦਾ ਸ਼ੋਰ,
ਦਰਿਆ ਦੇਖ ਸਮੰਦਰ ਦੇਖ

ਬਣਕੇ ਹਿੰਦੂ ਮੁਸਲਿਮ ਸਿੱਖ,
ਰਚਦੇ ਲੋਕ ਅਡੰਬਰ ਦੇਖ

ਨੀਵਾਂ ਰਹਿ ਪਰ ਉੱਚਾ ਸੋਚ,
ਉੜਦੇ ਪੰਛੀ ਅੰਬਰ ਦੇਖ

ਦੇਵੇ ਤੈਨੂੰ ਜੀਵਨ ਜਾਚ ,
' ਮਹਿਰਮ ' ਐਸਾ ਰਹਿਬਰ ਦੇਖ

ਪਿਆਰ ਬਦਲੇ ਪਿਆਰ ਹੋਵੇ...

2009-02-10T20:59:00.000-08:00

ਹਰ ਕਿਸੇ ਦਾ ਯਾਰ ਹੋਵੇ , ਲਾਜ਼ਮੀ ਨਈਂ
ਪਿਆਰ ਬਦਲੇ ਪਿਆਰ ਹੋਵੇ , ਲਾਜ਼ਮੀ ਨਈਂ

ਜ਼ਿੰਦਗੀ ਵਿੱਚ ਘੋਲ ਹੈ ਹਰ ਮੋੜ ਉੱਤੇ ,
ਹਰ ਜਗਾ ਤੇ ਹਾਰ ਹੋਵੇ , ਲਾਜ਼ਮੀ ਨਈਂ

ਯਾਰ ਨੂੰ ਤੂੰ ਜਿਸ ਗਲੀ ਵਿੱਚ ਭਾਲਦਾ ਏਂ ,
ਉਸ ਗਲੀ ਵਿੱਚ ਯਾਰ ਹੋਵੇ , ਲਾਜ਼ਮੀ ਨਈਂ

ਜੋ ਕਰੇ ਉਪਕਾਰ , ਉਸਦਾ ਹਰ ਕਿਸੇ ਤੋਂ ,
ਹਰ ਜਗਾ ਸਤਿਕਾਰ ਹੋਵੇ , ਲਾਜ਼ਮੀ ਨਈਂ

ਵੋਟ ਮੰਗਣ ਦਰ ਤੇਰੇ ਤੇ ਪਹੁੰਚਿਆ ਜੋ ,
ਉਹ ਸਹੀ ਹੱਕਦਾਰ ਹੋਵੇ , ਲਾਜ਼ਮੀ ਨਈਂ

ਬਾਗ ਅੰਦਰ ਲਾਜ਼ਮੀ ਹੈ ਫੁੱਲ ਦਾ ਖਿੜਨਾ ,
ਬਾਗ ਅੰਦਰ ਖ਼ਾਰ ਹੋਵੇ , ਲਾਜ਼ਮੀ ਨਈਂ

ਜੋ ਕਹੇ ਉਸਦੀ ਕਲਾ , ਫ਼ਨਕਾਰ ਦਾ ਵੀ ,
ਵੈਸਾ ਹੀ ਕਿਰਦਾਰ ਹੋਵੇ , ਲਾਜ਼ਮੀ ਨਈਂ

ਕਹਿ ਲਵੋ ਸਾਰੇ ਜਹਾਂ ਨੂੰ ਆਪਣਾ , ਪਰ ,
ਰਹਿਣ ਲਈ ਘਰ ਬਾਰ ਹੋਵੇ , ਲਾਜ਼ਮੀ ਨਈਂ

ਲਾਜ਼ਮੀ ਨਈਂ ਹਰ ਸਮੇਂ ਇਕਰਾਰ ' ਮਹਿਰਮ ',
ਹਰ ਸਮੇਂ ਇਨਕਾਰ ਹੋਵੇ , ਲਾਜ਼ਮੀ ਨਈਂ
------------------------------------------

ਭੁਲਾਇਆਂ ਵੀ ਨਹੀਂ ਭੁੱਲਦੀ ......

2009-02-10T20:21:00.000-08:00

ਉਨਾਂ ਦਾ ਕੀ ਕਰਾਂ ਯਾਰੋ , ਸਤਾਉਂਦੇ ਨੇ ਜੋ ਆ ਕੇ ਯਾਦ
ਭੁਲਾਇਆਂ ਵੀ ਨਹੀਂ ਭੁੱਲਦੀ , ਬੜੀ ਦੇਖੀ ਭੁਲਾ ਕੇ ਯਾਦ

ਮਿਲੇ ਆਪਾਂ ਜਦੋਂ , ਜਿੱਥੇ , ਉਨਾਂ ਰਾਹਾਂ ਤੇ ਆ ਕੇ ਵੇਖ ,
ਭੁਲੇਖਾ ਪੈ ਰਿਹਾ ਕੋਈ ਕਰੇ ਹੁਣ ਵੀ ਬੁਲਾ ਕੇ ਯਾਦ

ਮੇਰੇ ਮਿੱਤਰ ਬੜਾ ਪੁੱਛਦੇ , ਤੇਰੇ ਬਾਰੇ ਬਹਾਨੇ ਨਾਲ ,
ਉਨਾਂ ਨੂੰ ਕੀ ਭਲਾ ਮਿਲਦਾ , ਪੁਰਾਣੇ ਦਿਨ ਕਰਾ ਕੇ ਯਾਦ

ਹਨੇਰੇ ਵਿੱਚ ਇਕੱਲਾ ਬਹਿ , ਕਰੇ ਗੱਲਾਂ ਜੋ ਕੰਧਾਂ ਨਾਲ ,
ਕਿਸੇ ਨੂੰ ਕੀ ਪਤਾ ਕਿਸ ਨੂੰ , ਕਰੇ ਉਹ ਮੂੰਹ ਛੁਪਾ ਕੇ ਯਾਦ

ਮੁਹੱਬਤ ਦਾ ਤਕਾਜ਼ਾ ਹੈ , ਜਾਂ ਕਰਦੇ ਨੇ ਦਿਖਾਵਾ ਲੋਕ ,
ਦੀਵਾਰਾਂ ਤੇ ਲਗਾ ਲੈਂਦੇ , ਉਹ ਸ਼ੀਸ਼ੇ ਵਿੱਚ ਸਜਾ ਕੇ ਯਾਦ

ਹੁਣੇ ਤੂੰ ਨਾਂ ਲਿਆ ਜਿਸਦਾ , ਖੜਾ ਹੈ ਉਹ ਦਰਾਂ ਤੇ ਆਣ,
ਇਵੇਂ ਲੱਗਦੈ ਜਿਵੇਂ ਉਸਨੂੰ , ਤੂੰ ਕਰਦੈਂ ਦਿਲ ਲਗਾ ਕੇ ਯਾਦ

ਪੁਰਾਣੇ ਖ਼ਤ ਕਿਤਾਬਾਂ ਚੋਂ , ਜੇ ਮਿਲਦੇ ਨੇ ਤਾਂ ਰੱਖੀ ਸਾਂਭ ,
ਨਹੀਂ ਦਿਲ ਚੋਂ ਮਿਟਾ ਹੁੰਦੀ , ਕਿਸੇ ਦੇ ਖ਼ਤ ਜਲਾ ਕੇ ਯਾਦ

ਗਿਲੇ ਸ਼ਿਕਵੇ ਮਿਟਣ ਸਾਰੇ , ਬਚੇ ਬਾਕੀ ਰਤਾ ਨਾ ਮੈਲ ,
ਕਿਸੇ ਨੂੰ ਵੀ ਕਰੇ ਬੰਦਾ , ਜਦੋਂ ਹੰਝੂ ਵਹਾ ਕੇ ਯਾਦ

ਕਦੇ ਬਣਦੀ ਨਹੀਂ ਦੇਖੀ , ਜ਼ਮਾਨੇ ਦੀ ਮੁਹੱਬਤ ਨਾਲ ,
ਉਹ ' ਮਹਿਰਮ ' ਨੂੰ ਕਰੇ ਤਾਹੀਂ , ਜ਼ਮਾਨੇ ਤੋਂ ਛੁਪਾ ਕੇ ਯਾਦ
------------------------------------------------------

ਐਵੇਂ ਨਾ ਦੁੱਖ ਜਰਦੇ ਲੋਕ

2009-02-10T08:22:00.001-08:00

ਐਵੇਂ ਨਾ ਦੁੱਖ ਜਰਦੇ ਲੋਕ
ਅਪਨੀ ਕੀਤੀ ਭਰਦੇ ਲੋਕ

ਮਾੜੇ ਨੂੰ ਇਹ ਮਾਰਨ ਹੋਰ ,
ਡਾਢੇ ਤੋਂ ਹੀ ਡਰਦੇ ਲੋਕ

ਔਖਾ ਫੜਨਾ ਮਨ ਦਾ ਚੋਰ ,
ਕੁਝ ਕਹਿੰਦੇ ਕੁਝ ਕਰਦੇ ਲੋਕ

ਗੈਰਾਂ ਤੇ ਕੀ ਕਰਨਾ ਰੋਸ ,
ਦਿੱਦੇ ਧੋਖਾ ਘਰ ਦੇ ਲੋਕ

ਰਿਸ਼ਤੇ ਨਾਤੇ ਕਿਸ ਨੂੰ ਯਾਦ ,
ਦੌਲਤ ਉੱਪਰ ਮਰਦੇ ਲੋਕ

ਦਿੰਦੇ ਨੂੰ ਕਿਸਮਤ ਨੂੰ ਦੋਸ਼ ,
ਖ਼ੁਦ ਹੀ ਬਾਜ਼ੀ ਹਰਦੇ ਲੋਕ

ਸਿਫ਼ਤਾਂ ਸੁਣ ਕੇ ਫੁੱਲਦੇ ਦੇਖ ,
ਸੱਚੀ ਸੁਣ ਕੇ ਠਰਦੇ ਲੋਕ

ਜੀਵਨ ਡੂੰਘਾ ਸਾਗਰ ਯਾਰ ,
ਜਿਸ ਵਿੱਚ ਡੁੱਬਦੇ ਤਰਦੇ ਲੋਕ

ਡੇਰੇ ਜਾ ਬਖਸ਼ਾਉਂਦੇ ਰੋਜ਼ ,
' ਮਹਿਰਮ ' ਭੁੱਲਾਂ ਕਰਦੇ ਲੋਕ
----------------------------

ਹਰ ਸ਼ਹਿਰ ਹਰ ਨਗਰ ਵਿਚ ........

2009-02-10T08:07:00.000-08:00

ਹਰ ਸ਼ਹਿਰ ਹਰ ਨਗਰ ਵਿਚ , ਕਿੰਨੇ ਉਦਾਸ ਚਿਹਰੇ

ਮਜ਼ਬੂਰੀਆਂ ਦੇ ਮਾਰੇ , ਫਿਰਦੇ ਨਿਰਾਸ ਚਿਹਰੇ

ਕੀ ਗੈਰ ਦਾ ਭਰੋਸਾ , ਬਣਦੈ ਕਿਸੇ ਦਾ ਕਿਹੜਾ ,

ਹੁੰਦੇ ਉਹ ਦੂਰ ਦਿਲ ਤੋਂ , ਰਹਿੰਦੇ ਜੋ ਪਾਸ ਚਿਹਰੇ

ਪਰਦੇਸ ਜਾਣ ਵਾਲੇ , ਮਨਜ਼ੂਰ ਹੈ ਵਿਛੋੜਾ ,

ਭੁੱਲੀਂ ਨਾ ਤੂੰ ਜੋ ਕਰਦੇ , ਹਿਰਦੇ ਚ ਵਾਸ ਚਿਹਰੇ

ਰੱਖਦੇ ਜੋ ਮੈਲ ਦਿਲ ਵਿਚ, ਕਰਦੇ ਗਰੂਰ ਨੇ ਜੋ ,

ਭੁੱਲ ਕੇ ਵੀ ਉਹ ਕਿਸੇ ਨੂੰ , ਆਉਂਦੇ ਨਾ ਰਾਸ ਚਿਹਰੇ

ਜਦ ਵੀ ਨਕਾਬ ਉੱਤਰੇ , ਜਾਂ ਫਿਰ ਕਰੀਬ ਰਹਿ ਕੇ ,

ਲੱਗਦੈ ਪਤਾ ਕਿ ਕਿੰਨੇ , ਲੋਕਾਂ ਦੇ ਪਾਸ ਚਿਹਰੇ

ਪੈਂਦੀ ਜਦੋਂ ਜ਼ਰੂਰਤ , ਪੱਲਾ ਉਹ ਝਾੜ ਜਾਂਦੇ ,

ਹੁੰਦੇ ਜੋ ਖਾਸ ਮਿੱਤਰ , ਹੁੰਦੇ ਜੋ ਖਾਸ ਚਿਹਰੇ

ਦੰਗੇ ਫਸਾਦ ਕਰ ਕੇ , ਮਿਲਦਾ ਕਿਸੇ ਨੂੰ ਕੀ ਹੈ ,

ਔਵੇਂ ਜਨੂਨ ਵਿਚ ਉਹ , ਕਰਦੇ ਖਲਾਸ ਚਿਹਰੇ

ਸਭ ਨੂੰ ਜੋ ਆਖਦਾ ਹੈ , ' ਮੈਂ ਦਾਸ ਹਾਂ ਤੁਹਾਡਾ ' ,

ਬੈਠੇ ਨੇ ਕੁਰਸੀਆਂ ਤੇ , ਉਸ ਦੇ ਹੀ ਦਾਸ ਚਿਹਰੇ

ਰਿਸ਼ਤੇ ਤਾਂ ਖੂਨ ਦੇ ਨੇ , ਪਰ ਤਾਂਘ ਨਾ ਦਿਲਾਂ ਵਿਚ,

ਇਨਸਾਨ ਕੀ ਘਰਾਂ ਵਿਚ , ਕਰਦੇ ਨਿਵਾਸ ਚਿਹਰੇ

ਆਕਾਸ਼ ਛੂਹ ਰਹੇ ਨੇ , ਪਰਵਾਜ਼ ਭਰ ਗਏ ਜੋ ,

ਕਮਜ਼ੋਰ ਦਿਲ ਦੇ ਮਾਲਿਕ , ਬੈਠੇ ਉਦਾਸ ਚਿਹਰੇ

ਚਿਹਰੇ ਬੁਝਾ ਰਹੇ ਨੇ , ' ਮਹਿਰਮ ' ਪਿਆਸ ਮਨ ਦੀ ,

ਤਾਂ ਹੀ ਜਗਾ ਕੇ ਮਨ ਵਿਚ , ਰੱਖਦੇ ਪਿਆਸ ਚਿਹਰੇ

----------------------------------------------